Ekhaikhai weera ootheene ahu nneetta ephiro ya ehuhu “yowoopiha” vantxipale, Yesu aahitthana okhala “ohawa otokotoko”. (Matheyo 24:21) Hiyo khanintthuneya ohiya paahi ephiro eyo yowoopiha, mene ontthuneya opaka etthu weera niisaakihe. Ninrowa opaka eheeni?

Mwaha wa omwaako, Yesu aavaha miruku iya eraaka: “Vano mwàseke toko omwene wa [Muluku] ni exariy’awe.” (Matheyo 6:33) Ninrowa opaka haayi eyo?

Mpatxereke waasaasa omwene wa Muluku. Eyo entaphulela weera nooneke omwene okhala wootthuneya vantxipale opwaha itthu ikina. (Matheyo 6:25, 32, 33) Heeni nintthuneyaahu woona mootene yoola? Mwaha wooweera atthu khanwera omaliha maxupo ankhumelela. Omwene wa Muluku paahi toneera omalihe maxupo awo.

Mwaasaase exariyaawe. Nintthuneya opaka sootheene ninwera ahu moowiwanana ni malamulo ni miruku sa Muluku. Mwaha wa heeni? Mwaha wooweera natthanla opaka yooreera naari yoonanara, ninrowa ophwanya maxupo. (Miruku 16:25) Vanonto, naapakaka itthu moowiwanana ni malamulo a Muluku, khoiyono nimmuhakalaliha paahi Muluku, mene tho, ninniisaasera murettele asineenaahu — Yesaya 48:17,18.

Nvirelele waasaasa toko omwene wa Muluku ni exariyaawe. Yesu ahilopola ariki, atthu akina anoowera ohapuxiwa yuupuwelaka weera anoowera ophwanya muhakhu muntxipale. Atthu akina  anoowera ohiya ehapuxiwaka ni sootthuna sa murimaaya ophiyera ohikhalano ehuhu ya waasaasa Omwene wa Muluku. — Matheyo 6:19-21, 25-32.

Mwa yeyo, Yesu ahilaihera weera yaale yaarowa okhavihera Omwene wa Muluku, yaarowa ophwanya ele entthunaaya vaanaano vaava otteeliwa murima ni okhalano murettele woohimala. — Matheyo 6:33.

Naamwi oohusera a Yesu mu eseekulu yoopatxera yaasaasa Omwene wa Muluku ni exariyaawe, awo khiyoonale masooso ni maxupo mookumini mwaya. Mene awo yaari oowakihereya. Moota heni?

Awo yannipaka itthu mowiwanana ni malamulo a Muluku, ni Muluku aawakihera maxupo ale yaaphwannye atthu ale yaahiiwelela soohima sa Muluku. Nroromelo naya noolipa nooweera Omwene wa Muluku onaarwe, nahaakhavihera ovilela maxupo mantxipale a mookumini. Ni Muluku ahaavaha “owerya wú otokotoko” weera awo awere ovilela. — 2 Akorinto 4:7-9.

Makristu a eseekulu yoopatxera, yaahiwelela nlamulo nenne Yesu aahimmaawe nooweera waasaase toko Omwene wa Muluku. Awo yaalaleya mitthenka sooreera sa Omwene mu elapo yootheene. (Akolosi 1:23) Neereke olelova, aakhala atthu ampaka eyo tho?

Aani! Anamoona a Yehova annisuwela weera, ehanle ehuhu vakhaani weera Omwene wa Muluku waahonone atthu oonananara murima a elapo ela. Nto mwaha woosuwela ewo, awo annipaka etthu eeri yootheene aniweraaya weera ekwanihere masu Yesu ahinmawe weera: “Evanjelyo ela ya Omwene enelaleiwe elapo yothene ntoko onamona wa amalapo athene. Nomalá enerwe emalihero.” — Matheyo 24:14.

Munrowa waakhela hayi mitthenka sooreera? Ninvekela weera nyuwo mwaatakiheke atthu yakhala eseekulu yoopatxera. Yaawo yaakhala eboma ya oMacedoniya yo oBereya. Yaiwalaya mitthenka sooreera sa Omwene seiyo alaleyaawe murummwa Paulo, yahaakhela mitthenka iyo “ni murima wothene” ni ‘etokosaka nihiku ti nihiku solempwa’ weera yòne seiya sari siso. — Miteko 17:11, 12.

Nyuwo-tho munoweera opaka hiiho. Mwawera wasaasera Omwene wa Muluku ni exariyawe, nyuwo munoophwanya ntthawelo ni waakiheriwa ni munookhalano murettele woolipa muhoolo.