Hiyo ninnaattamela okathi enrowa aya okhumelela “ehasara” yuulupale, yeeyo Yesu aahimmye awe okhala “maxakha malupale”. (Matheyo 24:21) Hiyo khaninwerya otthyawa maxakha awo maalupale. Masi nnoowerya opaka etthu wira noopowe. Etthu xeeni?

Okathi Yesu aalavula awe Mwaha awe Vamwaako, owo aahimmye so: “Mpajeryeke ophavela Omwene wa Muluku ni wiwelela otthuna wawe”. (Matheyo 6:33) Ninrowa opaka sai eyo?

Mpaceryeke ophavela Omwene wa Muluku. Eyo enitaphulela wira nihaana ohela nipuro noopacerya Omwene wa Muluku mookumini mwahu. (Matheyo 6:25, 32, 33) Xeeni vanireerela aya ohela Omwene nipuro noopacerya? Mwaha woowi, Omwene wa Muluku tonrowa owerya omaliha mixankiho sotheene ikuvernu sa apinaatamu sihiwenrye aya omaliha.

Mphaveleke exariya ya Muluku. Nihaana wiimananiha okhala moovarihana ni malamulo a xariya a Muluku. Mwaha wa xeeni? Mwaha woowi, vaavo nihintthara ahu ele Muluku onihimya awe okhala yooloka ni yoohiloka, sinnikhumelela mixankiho sinceene. (Miruku 16:25) Masi vaavo ninthanla ahu omwiiwelela Muluku, ninnimuhakalaliha ni ninnikhalana okumi woohakalaliha.—Yesaya 48:17, 18.

Muhihiye ohela nipuro noopacerya Omwene wa Muluku ni exariya awe. Yesu aahihimya wira atthu akina yaarowa ophavelaka mihakhu paahi, yuupuwelaka wira musurukhu onimwaaphwanyiha mikhalelo  sooloka muhoolo. Atthu akina yaarowa oxankaka ni itthu soovelaveliha sa khula nihiku ni eyo yanwiiriha ohikhalana okathi woophavela Omwene wa Muluku.—Matheyo 6:19-21, 25-32.

Masi Yesu aahihimya wira atthu ale anikhaliherya Omwene wa Muluku yamphwanyaka itthu sinaathowa niinaano-va ni anoophwanya mareeliho manceene muhoolo.—Matheyo 6:33.

Awiixutti a Yesu yaaniphavela Omwene wa Muluku ni exariya awe. Masi awo khiyaawenhe simanle ene mixankiho sa apinaatamu. Hata vaari siiso, awo yaahikhapeleliwa. Moota xeeni?

Awo yaakhala moovarihana ni malamulo a xariya a Muluku. Nto eyo yaahaakhaliherya osyaka mixankiho sinaakhumelela atthu ahinimwiiwelela Muluku. Tthiri yaanaamini wira Omwene onimoorwa, nto eyo yaahaakhaliherya ovilela mixankiho. Nave Muluku aahaavaha “owerya . . . wulupalexa”, wira avilele sootakhala.—2 aKorinto 4:7-9.

MaKristau a eseekulu yoopacerya yaahiiwelela yooruma ya Yesu ya opaceriha Omwene wa Muluku mookumini mwaya. Awo yaanilaleya ihapari sooreera sa Omwene khula opuro yaaphwanya aya atthu. (aKolosi 1:23) Niireke olelo-va aakhala atthu anipaka eyo?

Aayo! Anamoona a Yehova annisuwela wira ohanle okathi vakhaani wira Omwene wa Muluku opwetexe olumwenku ola wootakhala. Nto anniimananiha vanceene wira yiiwelele moolumo a Yesu ani: “Ehapar’ila yorera y’Omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”.—Matheyo 24:14.

Exeeni munrowa anyu opaka nuumala wiiwa ihapari sooreera? Hiyo ninnootumereryani ootthara ntakiheryo na atthu a epooma ya khalai ya oBereya, oMacedonia. Nuumala murummwa Paulo waalaleerya ihapari sooreera, awo yaaheemererya ni murima aya wotheene. Nto “nihiku ti nihiku yansoma Solempwa sa Muluku” wira awehe akhala wira itthu yiixuttihiwe aya saari seekeekhai, nuumala-vo yaanikhala moovarihana ni ele yiixuntte aya.—Miteko 17:11, 12.

Nyuwo muhaana opaka etthu emosaru. Akhala wira munoopaceriha Omwene wa Muluku ni exariya awe mookumini mwanyu, nyuwo munoophwanya nipuro nootthyawela niinaano-va ni munookhalana murettele ni ovareleleya wekeekhai muhoolo.