Maʼ tun xáantaleʼ yaan xan u taal junpʼéel baʼal bey jeʼex junpʼéel ciclóneʼ. Jesúseʼ tu yaʼaleʼ «yaan u sen muʼyaj máak» teʼ kʼiinoʼob jeʼeloʼ (Mateo 24:21). Chéen baʼaleʼ, kex maʼ tu páajtal k-púutsʼul tiʼeʼ, yaan tuʼux jeʼel u páajtal k-taʼakikbaeʼ. ¿Baʼax túun unaj k-beetik?

Jesúseʼ tu yaʼalaj: «Maʼ u xuʼulul a kaxtikeʼex táanil u Reino Dios yéetel u justicia» (Mateo 6:33). ¿Baʼax u kʼáat u yaʼal lelaʼ?

«Maʼ u xuʼulul a kaxtikeʼex táanil u Reino Dios». Lelaʼ u kʼáat u yaʼaleʼ unaj k-ilik bey maas kʼaʼanaʼan u Reino Dios tiʼ uláakʼ baʼaloʼoboʼ (Mateo 6:25, 32, 33). ¿Baʼaxten bey unaj k-ilkoʼ? Tumen chéen u Reino Dios kun utskíintik le problemaʼob yaan way yóokʼol kaabeʼ.

Kaxteʼex «u justicia». Lelaʼ u kʼáat u yaʼaleʼ unaj k-tsʼáaik k-óol k-beet baʼax ku yaʼalik Dios. ¿Baʼaxten unaj k-beetik? Tumen jeʼel u bintoʼon kʼaasil wa chéen toʼon k-chʼaʼtuklik baʼax uts yéetel baʼax kʼaaseʼ (Proverbios 16:25). Chéen baʼaleʼ wa k-beetik baʼax ku yaʼalik Jéeobaeʼ yaan k-kiʼimakkúuntik u yóol yéetel yaan u bintoʼon maʼalob (Isaías 48:17, 18).

¿Baʼaxten Jesúseʼ tu yaʼalaj: «Maʼ u xuʼulul a kaxtikeʼex táanil u Reino Dios yéetel u justicia»? Tumen yaan máaxoʼobeʼ jeʼel u binoʼob chéen tu paach taakʼineʼ. Uláakʼoʼobeʼ jeʼel u xuʼulul u kaxtikoʼob táanil le Reinooʼ tumen jeʼel u chʼíikiloʼob meyaj utiaʼal u tsʼáaikoʼob baʼax kʼaʼabéet tiʼ u familiaʼobeʼ (Mateo 6:19-21, 25-32).

 Chéen baʼaleʼ Jesúseʼ tu yaʼaleʼ le máaxoʼob ku tsʼáaikubaʼob tu tséel u Reino Diosoʼ yaan u yantal tuláakal baʼax kʼaʼabéettiʼob yéetel maʼ kun xáantaleʼ yaan u kʼamkoʼob u maasil bendiciónoʼob (Mateo 6:33).

U yáax discípuloʼob Jesúseʼ tu kaxtoʼob táanil u Reino Dios yéetel u justicia, chéen baʼaleʼ maʼ béeychaj u yilkoʼob u luʼsaʼal le muʼyajiloʼ. Kex beyoʼ yaan baʼax áantoʼob teʼ kʼiinoʼob jeʼeloʼ. ¿Baʼax ta tʼaaniʼ?

Letiʼobeʼ tu beetoʼob baʼax ku yaʼalik Dios, le oʼolal maʼ muʼyajnajoʼob jeʼex le máaxoʼob ku beetkoʼob chéen baʼax uts tu tʼaanoʼoboʼ. Tumen tu creertoʼob yaan u taal u Reino Dioseʼ páajchaj u aktáantkoʼob le problemaʼob anchaj ichil u kuxtaloʼoboʼ. Tsʼoʼoleʼ tsʼaʼabtiʼob tumen Dios «le páajtalil ku píitmáan tiʼ u muukʼ wíinik» utiaʼal u chúukpajal u yóoloʼoboʼ (2 Corintios 4:7-9).

Jeʼex tu yaʼalil Jesúsoʼ le sukuʼunoʼob teʼ yáax siglooʼ tu tsʼáajoʼob táanil u Reino Dios ichil u kuxtaloʼob. Letiʼobeʼ tu tsikbaltoʼob tiʼ u yéet kaajaloʼob baʼaxoʼob ken u beet u Reino Dios (Colosenses 1:23). ¿Yaan wa máaxoʼob bey u beetkoʼob xan teʼ kʼiinoʼobaʼ?

¡Yaan! U testigoʼob Jéeobaeʼ u yojloʼobeʼ ichil junpʼíit kʼiineʼ yaan u xuʼulsaʼal le baʼaloʼob kʼaastak tumen u Reino Diosoʼ. Le oʼolaleʼ ku yilik u beetkoʼob le baʼax tu yaʼalaj Jesúsaʼ: «Le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul» (Mateo 24:14).

¿Baʼax ken a beet kéen a wuʼuy le baʼaloʼob maʼalobtak ken u beet le Reinooʼ? K-líiʼsik a wóol utiaʼal ka a beet jeʼex u kajnáaliloʼob Berea, yaan tu luʼumil Macedoniaoʼ. Letiʼobeʼ ka tu yuʼuboʼob le baʼax ku yaʼalik le apóstol Pablooʼ «tu kʼamoʼob yéetel kiʼimak óolal» yéetel «sáamsamal kaʼach ku xakʼalxoktikoʼob tubeel u Tʼaan Dios utiaʼal u yilkoʼob wa jaaj le baʼaxoʼob ku kaʼansaʼaltiʼoboʼ», tsʼoʼoleʼ tu beetoʼob xan le baʼax tu kanoʼoboʼ (Hechos 17:11, 12).

Techeʼ jeʼel u páajtal xan a beetik beyoʼ. Wa ka kaxtik táanil u Reino Dios yéetel u justiciaeʼ, letiʼeʼ yaan u kanáantkech bejlaʼeʼ yéetel maʼ kun xáantaleʼ yaan u yantaltech kiʼimak óolal yéetel mix baʼal ken u beet a sajaktal.