Nyɔnɔnwi enyi mɔ Kristotɔwo degbele Moizi Se lɔ gɔnmɛ o, gan lɔnlɔn nɔ Mawu koɖo lɔnlɔn nɔ mìwo kpenawo kpɔtɔ nyi gɔnmɛɖokpe nɔ enu ciwo yí Yehowa biɔkɔ so mì shi. (Mt 22:37-39) Wodejinɔ amɛ koɖo lɔnlɔn ŋtɔ́ o. Mìɖo ana asun mì shi. Lé mìawɛ doɔ? Emɔ vevi ɖeka ci ji mìato yí nyi Bibla hlɛnhlɛn ŋkeŋke. Nɔ mìdo jeshi Yehowa nɔnɔmɛ vovovowo le Bibla mɛɔ, ena mìkpɔnɔ “Yehowa nyɔnyɔ.” (Eha 27:4; nwt, Gɔnm.) Le yiyi mɛɔ, lɔnlɔn ci mìɖo ni vashinnɔ doji yí mìwo susuwo vasɔnɔ koɖo yi tɔwo wu. Ecɛ cucunɔ mì yí mìwanɔ do yi sewo ji. Ese lɔwo domɛtɔ ɖeka yí nyi amɛɖekisɔsɔsavɔn lɔnlɔn ɖoɖo nɔ mɛbuwo. (Ʒan 13:34, 35; 1Ʒan 5:3) Emɔ amɛtɔn ciwo ji yí mìato nɔ Bibla hlɛnhlɛn avivinɔ nɔ mì ke:

• Zan ao tamɛbubu ŋsɛn koɖo ao ŋcinuwo. Kpɔɛ le susu mɛ mɔ ye le tɔxu gbɔxwe yí enu lɔ jɔkɔ. Nyi yí àtɛnŋ akpɔ, ase, yí ase hwɛnhwɛn nɔɔ? Seselelanmɛ ci yí mɛ ciwo ji enu lɔ jɔ do atɛnŋ aɖoɔ?

• Trɔnɔ ashi le ao Bibla hlɛnhlɛn mɔnuwo nu. Emɔnu ɖewo ke: Kɔ egbe yi ji ahlɛnnɔ Bibla lɔ, alo senɔ ci wohlɛn do kaji yí akplɔɛdo le ao Bibla mɛ. Àtɛnŋ ahlɛn Bibla mɛ xolɔlɔ ɖe ci yí kudo mɛɖe, alo enyɔci ɖe koŋ nu sɔ wu mɔ àhlɛn eta lɔwo eɖekplɔɖedo. Le kpɔwɛ mɛ, zan megbenya A7 alo B12 ci yí le Ŋɔŋlɔ Kɔkɔeawo Xexe Yeye Gɔmeɖeɖe mɛ yí ahlɛn enu so Yesu nu. Hlɛn eta ci mɛ yí woɖe ŋkeke ɖeshiaɖe mawunyɔkpukpui le pleŋ. Hlɛn Bibla mɛ wemawo le ɖoɖo ci nu yí woŋwlɛn wo do.

• Hliin koɖo susu mɔ yeamɔŋje mɛ. Eta kuɖeka hlɛnhlɛn gbeshiagbe, ase gɔnmɛ ni yí abu tamɛ kpɔ so nu nyɔ wu mɔ, woahlɛn eta sugbɔ koɖo susu mɔ woaɖegbɔ nɔ Bibla hlɛnhlɛn. Bu tamɛ kpɔ so nɔnɔmɛ lɔwo nu. Gbeje mɛ kitokito. Zan nyigban nɔnɔmɛ tatawo koɖo kpukpui bu ciwo yí kudo enu ci yí èhlɛnkɔ nu. Nɔ dese enu nyɛkuin ɖe mɛ can ɔ, wa numɛkuku so nu. Nɔ àsun jiɔ, zan gamɛ ci yí èzan do enuhlɛnhlɛn lɔ nu han ke asɔ bu tamɛ so nu.