Kadok tin wa Jukristu watie ngo i the Cik pa Musa, re cik ario ma dongo m’usagu zoo m’i ie, niwacu nimaru Mungu man nimaru wedi mwa, ucoko lembe ceke ma Yehova ubekwayu i bang’wa. (Mt 22:37-39) Mer maeno walage ngo alaga. Ukwayu wapidhe apidha i iwa. Nenedi? Yo acel ma pire tek utie nwang’u wabesomo Biblia kubang’ ceng’. Kinde ma wabesomo iwi kite ma tung’ tung’ pa Mungu i Biblia, waneno “bero pa Yehova.” (Zb 27:4) Lembuno ketho mer ma wamaru ko Yehova medere ameda man paru mwa de gam rombo ku pare. Eno ke docwaluwa niworo cik pare, m’uketho i ie ninyutho mer ma jutwoniri ko gijo pi jumange. (Yh 13:34, 35; 1Yh 5:3) Ibinwang’u piny e, juk adek ma copo konyi kara ifoy ku som peri mi Biblia:

• Tii ku paru peri, man miiri zoo i somne. Keketh nia ka nwang’u ini keca saa nica, ang’o m’icopo nineno, niwinjo, man ning’wiyo? Ecicopere nia ju ma juweco pigi i somne giwinjiri nenedi?

• Bed isom i ayi ma tung’ tung’. Icopo timo kumae: Nisomo ku dwal ma tek, kunoke niwinjo som ma jumaku con nwang’u ibelubo i Biblia peri. Icopo somo iwi ng’atu moko ma Biblia uweco pire kunoke iwi lembe moko mi Biblia kakare nisomo nzii. Ku lapor, icopo tio ku Guide d’étude de la Parole de Dieu, thenge mir 4 kunoke mir 16, pi ninyang’ iwi lembe m’ibesomo iwi Yesu. Icopo somo niai kud i Biblia thek ma juwodho giragora ma kubang’ ceng’ kud i ie. Icopo bende nisomo buku mi Biblia nimakere ku oro ma jukiewogi i ie.

• Som i ayi m’icopo nyang’ ko ma ber. Kakare nisomo thek dupa ku bang’ nindo kende kende pi nidaru som mi Biblia, etie ber m’usagu nisomo kadok thek acel kende kubang’ ceng’ ma nwang’u ibenyang’ ma ber man ibenyamu i lembe m’ibesomone. Nyang’ i kum lem m’ubino kadhu saa nica. Ng’ii i lembe ceke ma poto poto. Tii ku kart man som verse mange m’uweco iwi lem ma rom. Tim sayusac iwi lembe kadok acel m’inyang’ ungo i ie. Ka copere, mak saa ma rom m’isomo ko Biblia pi ninyamu i lembe m’isomone.