Iñchiñ pu kristianongen feypingekelaiñ taiñ inanieafiel Moyse tañi Ley dungu, welu Chaw Ngünechen ayükey taiñ inanieafiel ti epu werkün dungu doy falilu: piwkeyeafiel ta Chaw Dios ka taiñ chafche (Mt 22:37-39). Welu we choyüngelu müten iñchiñ, femngechi piwkeyekelaiñ, doy may duamfali taiñ yafüluwal. ¿Chumngechi? Müna falin-ngey fill antü taiñ papeltuafiel ta Biblia. Ka rakiduamliyiñ taiñ papeltukeel kimürpuaiñ fente ñi ayüfalngen Chaw Jewba tañi chumngen ka “tañi küme piwkengen” (Sl 27:4). Femngechi doy piwkeyeafiyiñ taiñ Fütra Chaw ka inayentuafiyiñ tañi rakiduam. Femün mu tüfa, inaniekeiñ tañi werkün dungu ka kom piwke mu piwkeyeniefiyiñ kakelu che (Jn 13:34, 35; 1Jn 5:3). Ngüneduamaiñ küla ngülam taiñ doy ayüwelmayaetew papeltual ti Biblia.

• Peyeniewaiñ reke tati nütram mu. Mülelu ti nütram mu trokiwküleaiñ. Adkintuaiñ, allkütuaiñ ka nümünümütuaiñ reke ti rupan dungu taiñ papeltumekefiel. Rakiduamaiñ ñi chum duamkülen pu che ti nütram mu.

• Fillke dungu femaiñ. Papeltuafuiñ newentu dungun mu kam allkütuafuiñ kiñe audio petu taiñ papeltumekeel. Kafey doyümafuiñ papeltunoal Biblia chumngechi ñi adkünungeel, doy may papeltuafuiñ kiñe che ñi nütram Biblia mu kam kiñe dungu taiñ duamnieel. Tüfa femafuiñ: taiñ papeltual Jesus ñi mongen adümafuiñ ti trokiñ 4 ka 16 mülelu ti papil Guía para el estudio de la Palabra de Dios (pag. 18, 20, 22, 24, 26, 28, 30, 32, 54 ka 56). Ka femngechi papeltuafuiñ ti kapitulo chew ñi entungeel ti versikulo fill antü ngealu, kam papeltuafuiñ ti lifru mülelu Biblia mu chumngechi ñi wirintukungeel.

• Papeltuaiñ taiñ adümal. Doy kümey fill antü papeltual kiñe kapitulo rewall ta re papeltual fentren kapitulo, femngechi adümaiñ ka rakiduamaiñ taiñ papeltumekeel mu. Küme ngüneduamkünuaiñ kom ti nütram ka rakiduamaiñ chem ñi rupamekefel feychi antü. Inaduamaiñ ti mapa ka fillke kellu mülelu. Ka küme pepilnofiliyiñ kiñe dungu eluwaiñ ta doy ngüneduamal. Pepilfalngele, tunte taiñ elantükünuel ta papeltual ka elantükünuaiñ ñi rakiduamal.