Moyizɩ ˈa gböö ˈnɩɛ Klɩtɩɛwaa yɔwʋ gwanɩ, maa gböö ˈkädɩ ˈkädɩɩ -mimii ˈsɔ -yɩ nʋä, -a nɩ -wa Lagɔ ˈn -a nɩ -wa -aa ˈbhɩa, ˈmö Zoova yɩbhää -a nɩ -gänɩ. (Mt 22:⁠37-​39) -Sɩbhä a -wawʋ ˈla, -a ˈnʋä -gwälɩnɩ. Maa, ˈyli yɔwʋ -a ˈkää ˈtɛmanɩ, wʋ -kaɲɩ dlɩ zɛmö plɛ. Sɛɛ -a ˈkä ɔ ˈzʋ ˈnɩ? Dɛsɛkälii -a ˈkää nʋ a glaˈmö a -nu -bhlʋ muä nɩɩ, zila ˈwuë ˈmö, -a nɩ ˈcɩɛ Biblë. -A -kɛɛ ˈmö zɛlɩ, Lagɔ ˈa -wʋwʋsaa a kii, -a -kii dlɩ kɛ ˈpänɩ, “ˈɔ kɛgänɔɔ” -yiɲɩ ˈmäna ˈmö päla. (Ps 27:⁠4) -A -kä -sɩbhä ˈzʋ, ɔ -wawʋ -yiɲɩ teɲii dlɩ zɛmö plɛ ˈn ˈɔ dlɩpäsaa -ɲɛ -aa -na ˈsɔ yi yɔwʋ mönɩ ˈtɩɩ. Mii -kaɲɩɛ -mä ˈsunɩ nzɩ Lagɔ ˈa gba -a nʋä nɩɩ, -a nɩ -wa -aa ˈbhɩa, -ɲɛ gböö -miˈla ˈwuë ˈsɔ, -a ˈki ˈklʋkpamö ˈzʋ. (Zh 13:⁠34, 35; 1Zh 5:⁠3) -Lii a ˈki ta -yɩ ˈkää ˈŋlɩ -kä Biblë a ˈmözɛlɩzɛlɛ -kaɲɩ ˈmäna ˈwʋ -bhö, miɛ dɛˈɛ:

• ˈSaa -n zɛlɩɛ ˈmö, yɩlɩnii dlɩ zɛmö ˈwʋ, ylɛylɛlu a sɛ. ˈPä dlɩ nɩɩ, ˈsaa plɩɛ ˈwʋ, -naˈbhë -n -wʋmö -lɛ. ˈSaa -n yɩlɩ ɔ ˈwʋ ˈnɩ? ˈSaa -n ˈnʋ ɔ ˈnɩ? Ŋlɛ -mɛ -n ˈnʋ ɔ ˈnɩ? -Waɲɩ wɛlɩ -n zɛlɩɛ ˈmö, sɛɛ wa pä ɔ dlɩ ˈnɩ?

• Ghlɛnɩ ˈki a -bɛ ˈmö. -Mimii miɛ dɛˈɛ. -N -kä ˈmö zɛlɩ dɔˈwʋ -wʋ, ˈpä wɛlɩɩ ghäyɩ. -N -käˈɛ ˈyukwlipʋnɩlu -lɛ ˈzʋ, -su -naˈa Biblë -n ˈkä -mä yɩlɩ. Sɛɛ Biblë a kïbhï -glɛglɛnɩɛ ˈwʋ, -n -kä -wa, ti -sɩbhä ˈmö zɛlɩ. -Sɛ -lɛ Biblë ˈmö a nɩkpɛ -bhlʋ a wɛlɩɩ, ɛ -käˈɛ wɛlɩkïbhë -mämaa, -n ˈkä ˈmö zɛlɩ. Yɩɛ, Les Saintes Écritures. Traduction du monde nouveau, a dɛɛ wa ˈzʋä Appendice A7 ɛ -käˈɛ B12, ghlɛnii ˈmö -n ˈkä Zezwii a wɛlɩɩ ˈmö zɛlɩ. Biblë a kïbhëa ˈmö, mää wa -sɛ zɩˈɛ a Biblë a gbɛlʋ, -n bhɛnɩ -n ˈkä a ˈwuë ˈmö zɛlɩ. -N -kä Biblë a ˈbɔgwɩ ˈmö zɛlɩɛ yi, ˈtɛɲɩ wa ˈcɛliɛ ˈmö, ˈmö -n ˈpä dlɩ ˈwʋ.

• Sɛ -n ˈkää ˈmö ˈnʋ, zɛlɩ -sɩbhä ˈmö. Zila ˈwuë ˈmö, -n ˈkä Biblë a ˈkïbhë ˈmö zɛlɩ -n ˈka ˈmö ˈnʋ, ˈn -n ˈka dlɩ kɛ ˈpänɩ, mii nɛnɩɛ, mii zie -n ˈkä ˈfʋ Biblë a ˈkïbhï a -bɛ ˈmö zɛlɩ ˈwʋ. ˈSaa ˈplɩɛ ˈwʋ ˈn dɛ yɩ ˈplɩɛ ˈwʋ, yɩlii yɔwʋ. Vɩɛ -lii ˈtikïyiea ˈwuë ˈmö. Yɩlɩˈɛ katɩ (carte) ˈklʋ ˈn Biblë a gbɛlɩ -mimii yɩ -ɲɛ mönɩɛ yɔwʋ. ˈSaa -nn-ä ˈmö ˈnʋ, tɛlɩ sɛ -n ˈki ˈmö ˈnʋ. -N -kä bhɛnɩ, ˈtɛɲɩ -zɩmö -n libhïä ˈwʋ ˈn -n zɛlɩɛ ˈmö, ˈlibhï -sɩbhä a ˈtɛɲɩ ˈwʋ, -n ˈki dlɩ kɛ ˈpänɩ.