Lang be idalankon halak Kristen Titah ni si Musa. Hassi pe sonai, dua parentah sibanggalan na dong bani Titah ai, maningon do idalankon hita. Na parlobei mangkaholongi Naibata anjaha paduahon mangkaholongi hasoman. (Mat 22:37-39) Maningon marusaha do hita patuduhkon holong sisonai. Aha do na boi bahenonta? Sada cara na ponting ai ma mambasa Bibel bani ganup ari. Anggo iparimbagaskon hita pasal paruhuran ni Naibata na isuratkon bani Bibel, iarusi hita ma sonaha “hinajenges ni Jahowa” in. (Ps 27:4) Hasilni, lambin holong ma hita hu Bani anjaha gabe sihol ma hita mangusihi-Si. Hita pe lambin tarojur laho mandalankon parentah-Ni laho mangkaholongi halak na legan. (Joh 13:34, 35; 1Joh 5:3) I toruh on, dong do piga-piga cara na boi mangurupi hita ase lambin marosuh mambasa Bibel:

• Bayangkon ma na ibasa ham. Bayangkon ma ham adong bani sarita ai. Aha do na boi ididah, itangar, ampa ianggoh ham? Sonaha do pangahap ni halak na dong bani sarita ai?

• Gunahon ma piga-piga cara. Umpamani, basa ma gogoh atap pe boi do iihutkon ham pambasaan Bibel ai humbani rokaman audio. Marimbangkon mambasa mangihutkon binduni, basa ma pasal sarita atap pe topik na dong bani Bibel. Umpamani, sanggah mambasa pasal Jesus, gunahon ma Lampiran A7 atap B12 bani Kitab Suci Terjemahan Dunia Baru. Atap basa ma sada bindu humbani ayat na iulas bani ayat harian. Boi do homa ibasa ham Bibel mangihutkon panorangni sanggah buku ai isuratkon.

• Marusaha ma mangarusi aha na ibasa. Ulang ma tarolos mambasa Bibel ase podas salosei. Rahanan do sada bindu ibasa tiap ari, tapi boi iarusi ham anjaha iparimbagaskon isini. Bayangkon ma na masa bani sarita ai. Gunahon ma peta pakon referensi pinggir. Anggo dong na lang iarusi ham, bahen ma riset. Anggo boi, dos ma namin dokah ni ham mambasa ampa manrimangi isini.