Amin pe kalak Kristen lanai i teruh Undang-Undang Musa, dua perentah si mbelinna e eme—guna ngkelengi Dibata ras kalak si deban—tetap denga ipindo Dibata gelah sidalanken. (Mat 22:37-39) Kekelengen si bage labo baban lahir. Enda arus ipebelin. Uga carana? Salah sada cara si pentingna eme alu mbaca Pustaka tiap wari. Sanga sibaca erbage sipat Dibata si ituriken bas Pustaka, banci sigejapken “kiniulin [Jahwe].” (Msm 27:4) Hasilna, kekelengenta man Ia reh belinna janah perukurenta pe reh miripna ras Ia. Enda ngiahken kita ndalanken perentah Dibata, termasuk perentah guna mereken diri bas nampati kalak si deban. (Joh 13:34, 35; 1Joh 5:3) Lit telu cara si banci erban pembacan Pustaka reh riahna:

• Bayangken ras ukuri. Bayangken kam lit bas kejadin e. Kai si idahndu, begindu, ras anggehndu? Kai saja si igejapken kalak si lit i je?

• Gunaken erbage cara. Enda piga-piga saran: Baca alu ersora, ntah pe ikuti pembacan Pustaka arah rekamen audio. Asangken terjeng mbaca saja, pelajari terdauhen kerna kalak si lit bas Pustaka ntah pe sifat kalak e. Contohna, gunaken Lampiran A7 ntah pe B12 bas Kitab Suci Terjemahan Dunia Baru guna mbaca kerna Jesus. Baca kerina pasal si ikutip bas ayat harin. Baca ndigan buku-buku bas Pustaka itulis.

• Mbaca guna ngangkaisa. Pangen mbaca sada pasal tiap wari tapi banci iangkai ras iukuri, asangken mbaca mbue pasal gelah nggo dung saja. Ikutilah petunjuk enda. Pelajari tiap bagin. Gunaken peta ras cataten pinggir. Pelajari terdauhen adi lit sada hal si lenga angkaindu. Adi banci, asa buena waktu si gunaken bas mbaca, ase ka ban waktundu guna ngukurisa.