Akusa bo na Bekristen be nji beta bo Atiñe Moïse si, ve Metiñe mebaé ma dañe mfi été: e nye’e Zambe, a môte mbok, ma liti bia jame Zambe a yi na bi bo. (Mt 22:37-39) Bia bialé ki a avale nye’an ete. Bia yiane yé’é na bi bi wô. Jam ôsu ya ma ma dañe mfi bi ne bo, e ne na, bi lañe Bible môs ôse. Éyoñe bia ye lañ abui mefulu me Zambe e Kalate wé été, bia ye yen “abeñe Yéhôva.” (Bs 27:4) Nalé a bo na nye’ane bia nye’e Yéhôva ô nen, a na asimesane dangan e lu’an a éndé. Mam mete ma tindi bia na, bi tôñe metiñe me Zambe, ane di da jô na, bi nyume biabebiene mam asu bôte bevok amu bia nye’e be. (Jn 13:34, 35; 1Jn 5:3) Bone melebe melale ba, be ne volô bia na, nlañane Kalate Zambe ô bo zam:

• Yeme’e fas a wô’ôtane mam. Bo’o v’ane ô mbe valé éyoñe mam mete me mbe me boba’an. Jé wo yen, jé wo wôk, binyume bivé wo wôk? Bôte ya nlañ ôte ba yiane wô’ôtan aya?

• Ô ne lañe Kalate Zambe meval abui. Ô ne lañe yôp été, nge ke vô’ôlô môt a lañe nkol, ô ne fe bo te tôñe bekabetôlô avale be ne nta’an, amu wo kômbô kôme wôk ényiñe môt éziñe nge ke nlô ajô éziñ. Nge wo lañe nkañete Yésus, ô ne belane Guide d’étude de la Parole de Dieu section 4 nge ke section 16. Lañe’e kabetôlô ase ya éfuse ya môs. Lañe’e bekalate ya Bible ataté nyi a nga taté tiliban, akekui nyi a nga su’ulane tiliban.

• Lañe’ a nsôñane ya wô’ô jame wo lañ. E ne mfi ya lañe to’o ve kabetôlô wua, a nyoñ éyoñe ya tu’a wôk a bindi jam wo lañ, a na, ô lañ abui bekabetôlô fo’o v’amu wo kômbô lañ abui mefep. Fase’e vôme nkañete ôte wo boban. Fase’e fe bone be mam bese be tii a nkañete ôte. Bela’ane nkpwase si (carte), bone bikanga bi ne bifuse biziñ été, lañe’e bifuse ba lebe wo. Nge nalé a ne boban, bela’an bebé abim éyoñe wo te nyoñe na wo lañ, asu ya na ô bindi mame wo te lañ.