Lau sun mafalarun hamaali lan kristiánugu Lúrudu le ichugúbei lun Moisesi, arufudaméme lágili bián gumadi le wéirigutimabei lidan Lúrudu —línsiñedun Bungiu hama gürigia wáledi woun— ka lan lagurabubei Heowá wámagiñe (Mt 22:37-39). Mama lau ínsiñeni le wágurahoua. Mosu wafurendeiruni. Ida? Waliihanu Bíbülia sagü weyu ábanbei lídangiñe katei súdiniti le gayaraabei wadügüni lun wibihini. Dan le wararamagun asaminara luagun le waliihabei, aba wafurendeiruni ámuñegueinarügü igaburi le luágubei Heowá, ábati warihini “lanarime lubuidure” (Sal 27:4). Ítara, ábatima laganwoundun ínsiñeni le wasandirubei luagu ani furendeitiwa asaminara kei ligía. Ínchaha lumutiwa le lun gaganbadi wamá lun lugumadin Bungiu, íbini lun gumadi luáguti warufudun aban óunwenbu ínsiñeni hawagu amu darí aranseñu wamá lun wadügün sákürifisiu hawagu (Hn 13:34, 35; 1 Hn 5:3). Anihán ǘrüwa adundehani le lunbei wafalaruni lun hínsiñetima lan woun waliihanu Bíbülia:

• Dirá huméi le haliihabei lidan hisaminan. Samina humá ñéinñadün lan. Kaba hamuga hariha, haganba o hirimicha? Ida luba hamuga hasandiragun ha uágubaña labahüdawagúa houngua?

• Yusu humá ámuñegueinarügü igaburi lun haliihan. Gayaraati haliihanu Bíbülia lau umalali héreti o haganbahani laliihóun aban fánreinti le gürawáruaali tídangiñe sunme hasigiruñein lan aliihani. Lubaragiñe haliihani kapítulu aban lárigi aban, gayaraati haliihan luagu somu gürigia o sügǘ. Kei hénpulu, yusu huméi seksióun 4 luma 16 tidan garüdia Adundehani lun taturiahóun Lererun Bungiu lun haliihan luagu Hesusu. Gayaraati haliihani sun kapítulu le ídangiñebei lasagarúa bérusu le lánina sagü weyu. Gayaraati giñe haliihanu líburu burí to tídanboun Bíbülia según to abürüdǘboun furumiñe.

• Aliiha humá lun gunfuranda humani le haliihabei. Buítimati waliihan íbini ábanrügü kapítulu sagü weyu lun gunfuranda wamani, ráramagua wagíame asaminara luagun, sügǘ lau waliihan saragu kapítulu lúnrügü wawanserun. Samina humá luagu fulasu luma dan le ídanbei lasusereda abahüdaguni. Akutiha huméi kada aban lídangiñe katei le anügübei fulasu. Yusu huméi burí mapa ani áluaha huméi ariñahani le ídounbei lóunaha abürüdǘni burí le lárurugubei o lamidanguabei ubanaü. Áluaha humá ariñahani íbinirügü luagu aban katei le úati gunfuranda humani. Anhein gayara, ligiamemelá lidura dan le haubei aliiha luma dan le haubei asaminara luagu le haliihabei.