Maskin pa gendeh mas aplicable con el maga Cristiano el Ley de Moises, el dos de con todo importante mandamiento de este​—ama con Dios y ama con el projimo—​amo siempre el cosa ta pidi si Jehova kanaton. (Mt 22:37-39) Gendeh automatico que tiene kita ese amor. Debe con este cultiva. Paquemodo? El un importante manera amo por medio de lehida de Biblia cada dia. Si ta considera kita con el diferente aspeto del personalidad del Dios na Escritura, ta puede kita mira con el pagka-bueno de Jehova. (Sal 27:4) Como resulta, mas queda hondo el diaton amor y mas queda igual el diaton pensamiento con ele. Amo este el manda move kanaton para obedece con el maga mandamiento del Dios y demonstra deverasan amor con otro. (Jn 13:34, 35; 1Jn 5:3) Este el tres sugestion para queda kita mas alegre na diaton lehida de Biblia:

• Usa el de tuyu imaginacion y el de tuyu sentido. Imagina que talla tu. Cosa gaha tu mira, oi y ole? Cosa gaha el sentido de aquellos presente alla?

• Cambia el de tuyu manera. Este el cuanto maga opcion: Le todas o sigui mientras ta oi con el audio recording. Le acerca na un caracter na Biblia o topico en vez de le sunod-sunod con el maga capitulo. Por ejemplo, usa con el Appendix A7 o B12 na New World Translation of the Holy Scriptures para le acerca con Jesus. Le con el entero capitulo si onde base el texto de cada dia. Le con el maga libro del Biblia base na fecha que ya escribi con este.

• Le para entende. Mas bueno pa que le maskin un capitulo cada dia que ya entende tu y ya medita contra le manada capitulo para lang acaba este. Considera si onde este ya sucede. Examina con el maga detalle. Usa con el maga mapa y marginal reference. Man research maskin un punto que nuay tu entende. Si posible, dale tiempo para medita igual de tarda si ta le tu.