Malamulo a Mizé kali munipaganoni na Yezu, mbwenye malamulo aba meli manddimuwa​—omukwela Mulugu na omukwela muttu mukwihu—pungwela magano otene a wira dhinnifunana Yehova. (Mt 22:37-39) Okwela oku, kelíwe muttuya onobaliwana. Oku okwela onraviwa vang’ono-vang’ono. Onraviwa dhavi? Merelo oroma oravana okwela oku, ba omwengesaga Bibilia labo na labo. Iyo nigenanelaga merelo owodha-wodha a Mulugu alebiwe mMaleboni, ninela ‘orhawurha oziva wa wedda na Yehova.’ (Masal 27:4) Wedda na Yehova onela wenjedhavi okwela wehu vina dhubuwelo dhehu dhiganiwanana na dhaye. Wedda na Yehova onela wenjedha wiwelela wehu malamulo aye, vowi wiwelela malamulo a Mulugu kuloga okaana elemelelo ya omutabuwela muttu mukwihu. (Joau 13:34, 35; 1 Jo 5:3) Akala ninfuna wi wengesa wehu wa Bibilia okale w’opureleyamo, nivirihenimo maswagiho aba mararu:

• Ogengesaga karomaga wubuwelela, s’ohizuzumiha dhubuwelo-dhawodha. Wubuwelege buli vanipadduwoniva. Txini enoniwe, eniwiwe, vina enziveliwewi. Ogaviladdaniha na nipadduwona onowona wi ohikaana vawogolela?

• Ottiyanihege musunzeloya. Karoma wona malago aba: Wengesa na lizu na wiweya, obe ofwarihedhaga dhinengesiwa mwipanoni yovavihana mazu. Osakulege merelo a muttu-muttu olebiwe mBibiliani wi osunze, obe osakulege nsunzo ninfuniwe winanela, omwengese Bibilia ofwarihedhaga kapituludha. Ninga motagiha Yawenjedhedha A7 obe B12 mBibiliani wa Tradução do Novo Mundo da Bíblia Sagrada muhikala masunziho anloga dha okalawo wa Yezu. Wengesege masunziho otene alebeliwe vakapituluniva. Vina wengesege maleboya a mBibiliani alivo.

• Wengesege n’efunelo y’ononelamo. Wengesege kapitulu dhing’onovi wi ononelemo vina owodhege otanalela, masiki ekale kapitulu modha; eji enottiyana na wengesa na efunelo ya ogomiha ddimadha ohinonelagamo elo. Otanalelege mapadduwoya. Wubuwelelege ttarho modha-modha. Ovedege mburhodha dha mapadduwoya, vina muvirelanimwa. Ogahinonelegemo mutomaya okosege guru ya opepesa wi ononelemo. Egawodheya, mudhidhi wawo wotanalela oliganege na obule wa wengesa.