Khrihfa hna nih Moses Nawlbia kan zulh hrimhrim awk a si tinak cu a si lo, asinain a ngan bikmi nawlbia pahnih a simi—Pathian le innpa dawt ding timi nawlbia kha cu zulh rih awkah Jehovah nih a kan hal. (Matt. 22:37-39) Cu bantuk dawtnak cu ro bantukin kan ngeih ciami sining a si lo. Mah sining kha ngeih khawh awkah i zuam a hau. Zeitindah? Lam khat cu nifate Baibal relnak thawngin a si. Baibal chung i duh a nungmi Pathian sining kong kha kan ruah tikah Jehovah “a ṭhatnak” kha kan hmuh khawh lai. (Salm 27:4) Cutin kan tuah ahcun Jehovah kan dawtnak cu a ṭhang chin lai i amah bantuk hmuhnak kan ngei ve lai. Mah nih mahca ṭhatnak hlawtnak i tel in Pathian nawlbia hna zulh awkah a kan forh lai. (Johan 13:34, 35; 1 Johan 5:3) A tanglei ah Baibal rel duhnak lungthin ngeih dingin a bawmmi ruahnak cheuhnak pathum a um:

• Na mitthlam ah cuanter law mah ah ka um ve tiah ruat. Ka um ve tiah na mitthlam ah cuanter. Zeidah na hmuh lai i na theih lai, cun zei haw dah na theih lai? Mah hna ruangah zeitindah na intuar?

• Na rel ning kha thleng. Mah hi i thim khawhmi cheukhat an si: Awkhumhmi kha ngai law mah ningin rel asiloah thangpi in rel. Dal aa changchang in rel canah Baibal ah aa telmi pakhatkhat i a kong asiloah a kong pakhatkhat kha thim law rel. Tahchunhnak ah, Jesuh kong rel na duh ahcun Vawlei Thar Lehnak Baibal Thlaihhlei A7 asiloah B12 kha rel. Nicaang Baibal an laknak dal dihlak kha rel. A changchang in Baibal cauk pawl kha rel.

• Hngalhthiam dingin rel. Nikhat ah dal khat kha hngalhthiam awkah ruat buin rel cu dal tampi khulrang in rel nakin a ṭha deuh. Na relmi kong kha ruat law a dikthliar in hlathlai. Khuaram hmanthlak le a dang cherhchanhmi hna kha hmang. Na hngalh lomi a kong pakhat kha hlathlainak tuah. A si khawh ahcun na relmi kong kha ruah awkah a caan pe.