Ngacama tha easë hmaca kö fene la Wathebo i Mose, ngo ame pe, Iehova palahi a ajane tro sa drengethenge la lue wathebo ka sisitria, ene la troa hnimi Akötresie me hnimi itre xan. (Mat. 22:37-39) Nyipici laka, tha hna xupi së kö memine la ihnimi cili. Celë hi matre nyipiewekë tro sa eënyin. Tune kaa? Loi e tro sa catre e la Tusi Hmitrötr e nöjei drai. Ame la easa öhne la itre thiina i Akötresie e hnine la itre Hna Cinyihan ke, canga mama cile koi së la “lolo i Iehova.” (Sal. 27:4) Ame hë e cili, kola kökötre la ihnimi së koi Nyidrë, nge easë ha nyiqane ce mekun me Akötresie. Nge celë hi lai ka upi së troa drengethenge la itre wathebo i Nyidrë, tune la troa hnimi itre xan. (Ioane 13:34, 35; 1 Ioane 5:3) Hane hi la köni ewekë nyine troa kuca, matre thue aja së troa e Tusi Hmitrötr:

• Troa huliwane la mekuna së me pengö së itre atr. Loi e tro sa mekun ka hape, easa melëne la xötr hne së hna e. Nemene la hne së hna öhn, me dreng, me punepun? Ka tune kaa la itre atr xötreithi së?

• Nyimu aqane kuca. Hane hi la itre xa aqane troa kuca: Troa e catrën, maine drenge pena la itre nyine dreng. Maine jë, troa e la itre xötr ka qejepengöne la ketre atr e hnine la Tusi Hmitrötr, maine ketre tane mekun pena. Drei la ketre ceitun. Maine aja i epun troa atrepengöi Iesu hnyawa, xome jë la Ini 4 maine 16 ne la neköi itusi hna hape, Ixatua Göi Ini Tusi Hmitrötr. Ijije fe troa e asë la mekene tusi ne la xötr, ka nyitrepene la topik ne la drai. Nge loi e tro fe a e la itre itusi ne la Tusi Hmitrötr, thenge la aqane amë wengën itre ej.

• Troa e matre troa trotrohnin. Ame la ka nyipiewekë tre, troa e me lapa mekun me trotrohnine la ca mekene tusi e nöjei drai. Tha nyipiewekë kö troa e la nyimu mekene tus, göne hi matre troa ase. Loi e tro sa pane e me thele la itre hnepe ithuemacany, me xome fe lo itre imap. Loi e tro fe sa sine thele la itre mekun hne së hna tha trotrohnine hnyawa kö. Ketre, nyipiewekë fe troa xomi ijin, matre troa lapa mekune la itre hne së hna e.