To̱ná Kriste̱n we̱nge̱ i titino̱ pe̱ owas’a Mbend’a Mose, be byanedi bende̱ne̱ beba​—to̱ndo̱ Loba na munaso̱ngo̱​—be malee̱ biso̱ o patape̱m nje Yehova a mengane̱no̱ biso̱. (Mt 22:37-39) Di si yabane̱ nin ńai a ndolo. Jangame̱n nde o sa mo̱. Ne̱ni e? Mbadi po̱ ńa mweńa ńe nde ke̱ di malanga Bibe̱l buńa te̱. Di me̱ne̱ “muyao ma Yehova” ke̱ jombwedi bede̱mo ba Loba be nanga o Betiledi. (Mye 27:4) Nika e mabola ná ndolo di be̱ne̱nno̱ mo̱ e ńake, mo̱nge̱le̱ masu pe̱ ma timba be̱ ka mao. Nika e matute̱le̱ biso̱ o sengane̱ mambenda ma Loba, mena ma bambe̱ pe̱ bola la biso̱me̱ne̱ mususu na ndolo ońola bane̱. (Yoh 13:34, 35; 1Yoh 5:3) Mo̱nge̱le̱ malalo man o bola ná bolanga basu ba Bibe̱l bo bate do̱lo̱:

• Dutea, nde o bolane̱ pe̱ mabie̱ mo̱ngo̱ matanu. Dutea ná we o dibe̱ke̱le̱. Nje o me̱nde̱no̱ je̱ne̱, senga, na numbise̱le̱ pe̱ e? Ne̱ni ba bena ba ta oten ba tano̱ ba senga yen ebe e?

• Wengisane̱ mbad’a bolanga. Mbadi iwo̱ yin: Langa na doi la mo̱ń, to̱so̱ senga bolanga ba bosenga nde o bupe̱ pe̱ mo̱. Langa myango ma mot’a Bibe̱l mō̱ to̱so̱ tema po̱ o mulopo ma langa bepasi ba Bibe̱l bupisane̱ o̱da. K’eyembilan, bolane̱ mongo 4 to̱ 16 ma Guide d’étude de la Parole de Dieu o jokwa longe̱ la Yesu. Langa epas’a Bibe̱l ye̱se̱ we̱ni te̱xt a buńa e busino̱. Langa kalat’a Bibe̱l bupisane̱ o̱da i tilabe̱no̱.

• Langa o bwam ba so̱ṅtane̱. Ye bwam ná o lange to̱ epas’a Bibe̱l ewo̱ nde buńa te̱ ná o so̱ṅtane̱ mo̱ o duteye pe̱ ońol’ao, nika ńe muse̱ṅ buka langa bepasi jita buka te̱ ná o bo̱le̱ bolanga ba Bibe̱l. Ombwea mambo ma dinge̱le̱ nje weno̱ o langa. Ombwea matongo me̱se̱. Bolane̱ maduta, na bepasi ba Bibe̱l be bolabe̱ o mbasan. Po̱ngo̱ muwaso o to̱ti lena o si so̱ṅtane̱no̱. E we̱li te̱ be̱, bolane̱ mulemlem ma ponda o wusano̱ bolane̱ ońola bolanga ná o duteye.