Hali ni kerecɛnw tɛ Musa ka sariya kɔrɔ tugun, Jehova bele b’a ɲini an fɛ an ka cikanw bɛɛ la belebeleba fila nunu labato: ka Ala kanu ani k’an mɔgɔɲɔgɔn kanu (Mat. 22:37-39). An tɛ wolo n’o kanuya ye. An b’a ɲini le ka kɛ n’a ye. Cogo di do? Ka Bibulu kalan loon o loon, o ye fɛɛrɛ dɔ ye min kɔrɔtanin lo. N’an be Ala ka jogow koo lajɛ Bibulu kɔnɔ, an be “[Jehova] nɔɔrɔ” lo ye (Zab. 27:4, Bible senuma). O be kɛ sababu ye dɔ be to ka fara an ka kanuya kan a koo la ani dɔɔni dɔɔni, an ka miiriya n’a ta be kɛ kelen ye. O b’an lasun ka Jehova ka cikanw labato, i n’a fɔ k’an yɛrɛ saraka tɔɔw kosɔn sabu an b’u kanu (Zan 13:34, 35; 1 Zan 5:3). Ladili saba filɛ minw be se k’i dɛmɛ ka Bibulu kalan diyabɔ:

• A kɛ komi i be yen o koow kɛyɔrɔ la: Miiri k’i yɛrɛ ye o koow kɛyɔrɔ la. I be mun lo yera, i be mun lo mɛnna ani i be mun lo kasa mɛnna? Mɔgɔ minw kofɔra o maana kɔnɔ, n’a sɔrɔ u dusukunnataw ye mun ye?

• Baara kɛ ni fɛɛrɛ wɛrɛw ye: U dɔw ye nunu ye: kalan kɛ ni kaanba ye wala Bibulu kalangwɛ lamɛn ani tugu o kɔ i ka Bibulu kɔnɔ. Mɔgɔ dɔ ka koo kalan wala barokun dɔ sugandi k’a kalan sanni ka Bibulu ka kitabuw kalan ka tugutugu ɲɔgɔn kɔ. Ɲɛyirali fɛ, Yezu ka koo kalan bibulusenw kɔnɔ minw be sɔrɔ yɔrɔ nin na Traduction du Monde Nouveau kɔnɔ: Appendice A7 wala B12. Tilera kalan ka vɛrise bɔra sapitiri min kɔnɔ, o sapitiri bɛɛ kalan. Bibulu ka kitabuw kalan ka tugutugu ɲɔgɔn kɔ ka kɛɲɛ n’u sɛbɛwagati ye.

• I be min kalanna, a ɲini k’a faamu: A ka fisa i ka sapitiri kelen kalan loon o loon, k’a faamu ani ka miiri a kan, sanni ka sapitiri caaman kalan wasa wasa. A filɛ koow kɛra yɔrɔ min na. Kunnafoni misɛnw lajɛ. Baara kɛ ni kartiw ani kunnafoni wɛrɛw ye. Sɛgɛsɛgɛri kɛ koo dɔw kan i ma minw faamu. I be wagati hakɛ min ta ka kalan kɛ, o ɲɔgɔn ta ka miiri i ka kalan kan.