Eda sega ni vauci na lotu vaKarisito ena Lawa e vola o Mosese, ia na rua na ivunau levu duadua, ya mo lomana na Kalou kei na kainomu e se tiko ga kina na tikina bibi e vinakata vei keda na Kalou. (Mac 22:37-39) Eda sega ni sucu kaya mai na loloma qori. E vinakati gona meda bucina. Ena sala cava? Dua na sala na noda wilika e veisiga na iVolatabu. Nida vulica na duidui itovo ni Kalou e volai ena iVolatabu, eda na kila na “lagilagi i Jiova.” (Sm 27:4) Eda na lomani koya kina vakalevu, eda na vakatotomuria vinaka na nona rai. Ena uqeti keda qori meda muria na ivunau ni Kalou, wili kina na ivakaro meda dauloloma. (Jn 13:34, 35; 1Jn 5:3) Qo e tolu na vakatutu e rawa ni marautaki kina vakalevu noda wili iVolatabu:

• Mo dau raitayaloyalo, vakasamataka na ka o wilika. Raitayaloyalotaka ni o tu sara ga e kea. Na cava o na raica, rogoca se boica? Ena vakacava tu na ivakarau ni lomadra na talanoataki tiko?

• Veisautaka na ivakarau ni nomu wiliwili. Qo eso na vakatutu: Wilika vakadomoilevu, se vakamuria tiko na kena katokatoni. Wilika e dua e talanoataki se ulutaga, mai na nomu wilika veitaravi na wase ni iVolatabu. Kena ivakaraitaki, vakayagataka na iKuri A7 se B12 ena Vakadewa ni Vuravura Vou mo wilika kina na itukutuku kei Jisu. Wilika taucoko na wase ni iVolatabu e lavetaki mai na noda tikinivolatabu ni veisiga. Wilika na ivola vakaivolatabu me salavata kei na kedra veitaravi.

• Saga mo kila na ka o wilika. Ni o wilika e dua na wase ena dua na siga, saga mo kila qai vakasamataka vakatitobu, e vinaka cake sara qori mai na nomu wilika wale tu ga e vica vata na wase. Vakasamataka na kena ikotokoto kei na itukutuku matailalai. Vakayagataka na mape kei na idusi ni tikinivolatabu. Vakekeli ena dua na tikina e sega ni matata vei iko. Ke rawa, me tautauvata na levu ni gauna o wiliwili kina kei na nomu vakasama vakatitobu.