Eyɛ mli akɛ Kristofoi bɛ Mose Mla lɛ shishi moŋ, shi loloolo lɛ, Yehowa miikpa gbɛ akɛ wɔbo emli kitãi enyɔ ni he hiaa fe fɛɛ lɛ toi. Nomɛi ji, wɔsumɔ Nyɔŋmɔ, ni agbɛnɛ hu, wɔsumɔ wɔnyɛmi gbɔmɔ. (Mat 22:37-39) Akɛ suɔmɔ nɛɛ fɔɔɔ wɔ. Esa akɛ wɔfee nɔ ko dani wɔná. Mɛni esa akɛ wɔfee? Nɔ kome ni he hiaa waa ni esa akɛ wɔfee ji, ni wɔkane Biblia lɛ daa gbi. Kɛ́ wɔsusu Nyɔŋmɔ sui srɔtoi ni awie he yɛ Ŋmalɛ lɛ mli lɛ ahe lɛ, wɔnaa “Yehowa mlihilɛ lɛ.” (La 27:4) No hãa suɔmɔ ni wɔyɔɔ kɛhã lɛ lɛ mli waa, ni wɔsusuɔ nii ahe tamɔ lɛ. Enɛ tsirɛɔ wɔ ni wɔye ekitãi lɛ anɔ, ni kitãi nɛɛ ekome ji akɛ, wɔsumɔ mɛi krokomɛi bɔ ni kɛ́ ebi ni wɔkɛ wɔhe ashã afɔle wɔhã amɛ po lɛ, wɔbaafee nakai. (Yoh 13:34, 35; 1Yo 5:3) Naa nibii etɛ komɛi ni baahã o-Biblia kanemɔ lɛ aŋɔɔ:

• Feemɔ nibii ni okaneɔ lɛ ahe mfoniri, ni okɛ ohe awo shihilɛ lɛ mli. Feemɔ ohe mfoniri ni oyɛ jɛmɛ. Mɛni onaa, mɛni onuɔ, ni mɛɛ ŋma onuɔ? Te ekolɛ mɛi lɛ nu he amɛhã tɛŋŋ?

• Tsakemɔ bɔ ni okaneɔ lɛ ohãa lɛ mli. Naa gbɛi komɛi: Kanemɔ ni eje kpo loo bo rikɔdiŋ ko toi ni onyiɛ sɛɛ yɛ o-Biblia lɛ mli. Kanemɔ hei ni wieɔ mɔ pɔtɛɛ ko loo sane pɔtɛɛ ko he, moŋ fe ni obaakane lɛ yɛ bɔ ni ato yitsei lɛ anaa lɛ naa. Akɛ nɔkwɛmɔnɔ lɛ, kwɛmɔ Saji Krokomɛi A7 loo B12 ni yɔɔ Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ mli lɛ nɔ kɛkane Yesu he sane. Kanemɔ yitso ni ajie daa gbi ŋmalɛ lɛ yɛ mli lɛ fɛɛ. Kanemɔ Biblia mli woji lɛ yɛ be ni akɛŋmala lɛ naa.

• Kanemɔ ni onu shishi. Ehi akɛ obaakane yitso kome pɛ gbi fɛɛ gbi ni onu shishi jogbaŋŋ, moŋ fe ni obaakane yitsei pii akɛni ootao okane pii lɛ kɛkɛ hewɔ. Susumɔ shihilɛ mli ni nɔ ni okaneɔ lɛ tee nɔ yɛ lɛ he. Pɛimɔ nibii ni awie he lɛ amli. Okɛ map srɔtoi lɛ atsu nii, ní okwɛ ŋmalɛi krokomɛi ni kɔɔ nɔ ni okaneɔ lɛ he ní akɛ alfabɛtii ekadi lɛ (marginal references) hu. Kɛ́ hooo lɛ, taomɔ sane kome ko ni onuuu shishi lɛ mli jogbaŋŋ. Kɛ́ ebaahi lɛ, okɛ be falɛ ni okɛkaneɔ nii lɛ nɔŋŋ ajwɛŋ nɔ ni okaneɔ lɛ nɔ.