Náa kal ló béè kọọ̀ gbò e bà gé nyoone nvéè Kráìst á géná kèbá Log Mózìs, sõò pálàa kà a log ea bọọ èl déne​—ea dú gè vùlè Bàrì nè o nen​—baatẽ́ gbõ̀ònà nú e Jìhóvà bĩ́íná lọ̀líí bá kọ é naa. (Máát. 22:​37-39) Íb vulèí níì ní ea beè dìí ló aa gbàà kà nì. Èé íè ge toní. Mósĩ́ deè e? Enè kà pọ̀b kà sĩ́deè ge naamá níí dú gè olòó bugi Kpá Káí buù dee. Tṍó e bugì togó boo kele kele gá ea di ló kpãa e Bàrì íe dì belí bé ea dọ́a bàlà kẽ́ mm̀ Kpá Káí naa, èé gbóó mòn “bé e Jìhóvà dú lé naa.” (Ps 27:4) Nú ea é silà aa m dú gè kọọ̀ bẹẹ vulà é kpáá bọọ dọ ló vaá èé gbóó bugi togó belí ẹlẹ. Níí ólò naa kọ é sẹlẹ gbò lẹ̀ẹ̀là ea aa bá Bàrì, bií nágé ló a lẹ̀ẹ̀là ea kọ́ é ié vulè ea é náa kọ é tú lóó vaamá gyọ́ọ boo dõòna gbò. (Jọ́ọ̀n 13:​34, 35; 1 Jọ́ọ̀n 5:3) Gbò gá ea di kèí dú taà kà lọ̀ọ̀gà bug ea é náa kọ é dé kpéè ló bẹẹ bugì Kpà Káí:

• Dòòmà dẽe ló, vaá ò tú bug tààmà. Dòòmà dẽe kọ ò diè kĩá tṍó e nuá gé nááá. Éé ní eo gáẹ̀ beè mòn, dã̀ nè ge dã́ nù lóé? Nu beè láá tọá ló gbò e bà ló bel nyòòmà mm̀ nòòtẽ́í naa vàẹ?

• Òó láá tú kele kele bá sií ló. Nee sìgà kele kele bá eo é láá naamáí: Bugi dàlà moń boo, àbèè ò zọ gbátọ boo tṍó eo gé pãane tṍ ló moǹ ní e ba beè naa rẹ́kọọ̀d. Bugi nú ea kil ló enè nen ea di mm̀ Kpá Káí àbèè boo enè íb togó bel tãa vó eo bugì nyòòmà bé e bà noone naa. Dì belí nu dòòmà bá, be ò gbĩ́ì ge bugi nú ea kil ló Jíízọ̀s, bugi kiẽ́e ea kọlà Appendix A7 àbèè B12 ea di mm̀ the New World Translation of the Holy Scriptures. Bugi zivèkà dọ Kpá Káí e nú ea dì nè deè deeá aà. Bugi gbò kpá ea di mm̀ Kpá Káí nyòòmà bé e ba beè emí naa.

• Bugi boo béè ge dã́tẽ́ ló. Ge bugi kóló enè togó ea di mm̀ Kpá Káí buù dee vaá ò dã́tẽ́ ló nè ge olòó bugi togó boo palàge leè èl ge bugi gã́bug togó kóló boo béè ge bugi lọa bá. Bugi togó boo bé ea beè mèà naa. Pẹ̀tẽ́ nú ea kuu. Tú gbò máàp nè gbò kiẽ́e e bà kólí dõòna kà dọ̀ kpá káí siimá tóm. Kọ̀láá bé ea kil kẽ naa, gbĩ́tẽ́ ló enè gá eo bugì vaá nóo dã́à tẽ́ ló. Be à válí, tú gã́bug tṍó ea ólò tú ní bá gè bugi nuá bùgmà togó boo gbò nú eo beè bugi.