Dile etlẹ yindọ Klistiani lẹ masọ to Osẹ́n Mose tọn glọ ba, gbedide awe he klohugan to e mẹ lẹ—nado yiwanna Jiwheyẹwhe po kọmẹnu po—gbẹ́ yin dodonu nuhe Jehovah nọ biọ to mí si lẹ tọn. (Mt 22:37-39) Yè ma nọ dugu owanyi enẹ tọn. Yè nọ wleawuna ẹn wẹ. Gbọnna? Aliho titengbe dopo wẹ nado nọ hia Biblu egbesọegbesọ. To whenue mí lẹnnupọndo jẹhẹnu voovo Jiwheyẹwhe tọn he sọawuhia to Owe-wiwe lẹ mẹ ji, mí nọ mọ “whanpẹ Jehovah tọn.” (Slm 27:4) Taidi kọdetọn de, owanyi mítọn na ewọ nọ jideji bọ nulẹnpọn mítọn nọ wá taidi ewọ tọn dogọ. Ehe nọ whàn mí nado yìn gbedide Jiwheyẹwhe tọn lẹ, he bẹ owanyi mẹde-yido-sanvọ́ tọn didohia mẹdevo lẹ hẹn. (Joh 13:34, 35; 1Jo 5:3) Ayinamẹ atọ̀n delẹ die nado hẹn Biblu hihia yin awuvivinu:

• Nọ yí nukun homẹ tọn do pọ́n nujijọ lọ bo nọ ze dewe do e mẹ. Mí ni dọ dọ a tin to finẹ. Etẹwẹ a na mọ, bo sè, podọ owán tẹwẹ a na sè? Etẹwẹ na yin numọtolanmẹ mẹhe go e gando lẹ tọn?

• Nọ diọalọ. Nuhe a sọgan wà delẹ die: Hiawe daga, kavi hodo hoyidokanji de to owe towe mẹ dile a to todoaina ẹn. Hiawe gando mẹhe go Biblu donù de kavi hosọ de go kakati nado hia weta lẹ debọdo-dego. Di apajlẹ, yí Nudọnamẹ Dogọ A7 kavi B12 zan to Owe Wiwe lẹ—Lẹdogbedevomẹ Aihọn Yọyọ Tọn mẹ nado plọnnu gando Jesu go. Hia weta he mẹ wefọ egbesọ tọn yin didesọn blebu. Hia owe Biblu tọn lẹ debọdo-dego sọgbe hẹ ojlẹ he mẹ yé yin kinkan.

• Hiawe nado mọnukunnujẹemẹ. Weta dopo hihia bo mọnukunnujẹemẹ bosọ lẹnayihamẹpọn deji pọnte taun hú weta susu hihia plùlù nado yawu fó. Nọ gbadopọnna lẹdo nujijọ lọ tọn. Na ayidonugo nudọnamẹ flinflin lẹ. Yí yẹdide otò tọn lẹ po alọdlẹndonu ṣẹnṣẹn mẹ tọn lẹ po zan. E whè gbau, basi dodinnanu do nuagokun he mẹ a ma mọnukunnujẹ dopo ji. Eyin e yọnbasi, yí whenu dopolọ he a yí do hia nudọnamẹ de zan nado lẹnayihamẹpọn do e ji.