Kletiɛn se ˈe Moizɩ ɔˈ ˈtee ˈzɔn -nɩn, ˈklaa ˈtee klaɩˈˈ ˈsɔɔn -ɩn nɩan ˈe Moizɩ ɔˈ ˈtee ˈdhi ɛ, ɩan toɛ dhɛ Zoova a ˈbɔan -a -ˈyea nʋn. (Mt 22:37-39) -ˈMɛn ɲɔn ɔnˈ ˈghluu- Ɲɔnsoa -e -boɲiɔn ɔnˈ dɩkmaan- ˈmʋn. Ɛ nɩn kplɩn ɲʋn ˈye ˈcɩan. Ka ɲʋn ˈye ɩanˈ ˈcɩan sʋn nʋn -ɛn? Zro Biiblʋ ˈdhii zɔn ooˈˈ zɔn. -Bho -aa sa Biiblʋ ˈdhii zro ɛˈ -aa muɛn Zoova aˈ kplɩn anˈ kpɛ jhibho-, ɛɛ muɛn -nʋn -a -ˈye “Zoova aˈ ˈˈjhriinmɔɛn” ˈˈkpe iˈjhe. (Ps 27:4) Ɛ ˈyeɛ nʋn -aaˈ Ɲɔnsoa aˈ dɩkmaan- ˈye ˈˈkpe ˈˈkpa, -wɛeˈ -a -nɩn ɔn ˈye -tɔˈ inaansʋn- dhueˈ ˈbhle. Ɛɛ muɛn -aʋ ˈkpɩ -po -a -ˈye Ɲɔnsoa aˈ ˈtee ŋwɔn ˈjhe, -a -ˈye ˈtee -ɛɛ ˈtmʋan ɲʋn anˈ dɩ ˈˈduɛ ɛˈ dɩ ŋwɔn ˈjhe -ke. (Zn 13:34, 35; 1Zn 5:3) Dhɩ aˈ kpɛ taan -a -ˈbhɛɛa -a -ˈyea nʋn ˈˈdhe Biiblʋ aˈ zroaˈ ˈyea -aaˈ ˈtrɔn ˈbhle ɛ, ɩn ka:

• -Nʋʋn -manˈ -tɔˈ dhbho, po -manˈ ˈˈjɛ ˈbho Ɲɔnsoa aˈ dhbhonʋʋn- anˈ ˈgɔ ˈˈɩ. Nʋɛn -ka -manˈ ˈˈjɛ ɛˈ nɩan ˈo ɛ. Dhɩwɛ- -man ˈjhe -ɛ, -manˈ ˈŋwɔn -ɛn, ˈnʋn -wɛ -man ˈŋwɔn -ɛn? Ɲʋn nɩan ˈbho ɛɛˈ nɔnˈˈ tu ˈdhi -dhe ɛ, dɩ -wɛ -nɩn ˈbho ʋbʋ -gwlɩˈˈ -ɛ?

• Zian- -manˈ Biiblʋ aˈ zro sʋn ˈˈɩn. Dhɛ -ˈbhɛɛa -ˈyea nʋn ɛ ka: Po ghlu ˈˈjha -ˈyʋ zro, -ˈbhɛɛ -ke -bho -man sʋ zro ɛˈ, ˈyʋ -dheinˈˈ bho po. -ˈBhɛɛ -ˈye Biiblʋ aˈ -bo -ˈnɩɩn iˈcra -ˈyɩ zro. Appendix A7 -e   -e B12 nɩan ˈdhe Traduction du monde nouveau ˈdhi ɛ, -a -ˈbhɛɛ -a -ˈyɩ zro -wɛeˈ -a -ˈye Zezi ɔˈ bo iˈŋwɔn. Biiblʋ aˈ ˈfɔ -ɔ ˈdhe ˈdhi ɲʋn za texte du jour ɛ, zro ɔɔˈ klɛɛ ˈdhii. -Ka Biiblʋ aˈ ˈsɛɩ aˈ ˈcresʋn nʋan ˈdhe -dee sun ɛn, zrʋ ˈdhii -kaˈ -ke.

• Dhɩ -man zroa ˈbɔn ɩanˈ iˈŋwɔɛn in. -Bho -man sa Biiblʋ aˈ ˈˈjhriɛ klaaˈˈ dhueˈ gbai zro ˈdhe zɔn ˈdhi ˈˈdhe -man sɛ -tɔˈ ˈˈkpe i naan anˈ, ɛ ˈdhadhɛ ɛ ˈye telɛ- i zro Biiblʋ aˈ klɛɛ ˈdhii -zii. -Ka -bo -aa zroa nʋan ˈcreɛ- sʋn -e dhɩ aˈ klɛɛ nɩan ˈdhe ɔ ˈdhi -e, -a -naan ɩn -tɔˈ ˈˈkpe i. ˈBhlʋa aˈ katɩ -e “notes maginales” nɩan ˈdhe Biiblʋ ˈdhi ɛ, ŋmʋɩn jha -ke. Dhɛ -manˈ ˈŋwɔan in ɛn, ˈbɔn ɛɛˈ iˈŋwɔɛn- in. -Bho -man sa dhɛ ˈdhii zro ɛˈ, ˈˈdhuo- nɔnˈˈ ˈmʋn -ke -ˈyeɛ -tɔˈ ˈˈkpe i -naan.