Wala na ginapatuman sa mga Cristiano ang Mosaikong Kasuguan. Pero ginapakita sa duha ka pinakaimportante nga sugo sini, ang paghigugma sa Dios kag sa aton isigkatawo, kon ano gihapon ang ginapatuman ni Jehova sa aton. (Mat 22:37-39) Wala kita natawo nga may amo sini nga klase sang gugma. Dapat ini palambuon. Paano? Ang isa ka importante nga paagi amo ang pagbasa sang Biblia kada adlaw. Kon ginabinagbinag naton ang sarisari nga personalidad sang Dios nga mabasa sa Biblia, makita naton “ang kaayo ni Jehova.” (Sa 27:4) Gani, nagatubo ang aton gugma sa iya kag ang aton panghunahuna mangin pareho man sa iya. Magapahulag ini sa aton nga tumanon ang mga sugo sang Dios, lakip ang sugo nga magpakita sing masinakripisyuhon nga gugma sa iban. (Ju 13:34, 35; 1Ju 5:3) Ari ang tatlo ka panugda para mangin mas makawiwili ang pagbasa sa Biblia:

• Gamita ang imo imahinasyon kag mga igbalatyag. Imadyina nga ato ka didto. Ano ang imo nakita, nabatian, kag napanimahuan? Ano ayhan ang ginabatyag sang mga karakter?

• Lainlaina ang imo paagi. Ari ang pila ka opsyon: Basaha sing matunog, ukon sundi sa imo Biblia samtang ginapamatian mo ang audio recording. Basaha ang parte sa partikular nga karakter sa Biblia ukon ang topiko sa baylo nga basahon sing pasunod ang mga kapitulo. Halimbawa, gamita ang Apendise A7 ukon B12 sa Bag-ong Kalibutan nga Badbad sang Balaan nga Kasulatan para mabasa ang parte kay Jesus. Basaha ang bilog nga kapitulo nga ginkuhaan sang bersikulo sa adlaw-adlaw nga teksto. Basaha sing pasunod ang libro sang Biblia suno sa petsa sang pagsulat sini.

• Basaha nga may paghangop. Ang pagbasa sing isa ka kapitulo kada adlaw nga may paghangop kag pagpamalandong mas maayo sangsa pagbasa sing madamo nga kapitulo para lang matapos ang pagbasa. Pamensara ang kahimtangan. Usisaa ang mga detalye. Gamita ang mga mapa kag marhinal nga reperensia. Mag-research sa mga punto nga indi mo maintiendihan. Kon posible, ang imo pagpamalandong dapat pareho man kalawig sang imo pagbasa.