Se vre kretyen yo pa sou Lalwa Moyiz la, sepandan sa pa anpeche de pi gwo kòmandman ki mande pou n renmen Bondye ak pwochen nou yo rezime sa Jewova ap atann de nou jis jounen jodi a (Mt 22:37-39). Nou pa tou fèt ak lanmou sa a, nou dwe fè efò pou n genyen l. Ki jan n ka rive genyen l? Youn nan pi bon fason an se lè nou li Labib chak jou. Lè n medite sou divès aspè ki gen nan pèsonalite Bondye, jan sa parèt nan Bib la, nou rive wè “tout bon bagay Jewova gen lakay li”. (Sm 27:4.) Kòm rezilta, nou vin renmen l pi plis epi nou vin plis wè bagay yo menm jan avè l. Anplis de sa, sa pouse n obeyi kòmandman Bondye yo, san wete kòmandman ki mande pou n renmen lòt moun opwen nou dispoze fè sakrifis pou yo (Jan 13:34, 35; 1J 5:3). Men twa fason w ka itilize pou w fè lekti Labib ou vin pi enteresan:

• Sèvi ak imajinasyon w epi viv sa w ap li a. Eseye wè tèt ou nan sèn nan. Ki sa w wè, ki sa w tande e ki sant ou pran? Ki jan w panse moun y ap pale de yo nan istwa a santi yo?

• Itilize divès fason pou w li. Men kèk opsyon: Ou ka li awotvwa, ou ka koute yon anrejistreman odyo pandan w ap suiv nan bib ou. Ou ka li yon istwa ki pale sou yon moun nan Bib la oswa sou yon sijè olye pou w li chapit yo nan lòd yo ye a. Pa egzanp, sèvi ak Apendis A7 oswa B12 nan Labib — Tradiksyon monn nouvo a pou w li sou lavi Jezi. Li tout chapit tèks pou jounen an soti a. Li Bib la nan lòd yo te ekri l la.

• Pa annik li pou li. Li pi bon lontan pou w li menmsi se yon chapit chak jou nan objektif pou w konprann epi medite sou sa w li a, olye pou w li yon pakèt chapit jis pou w ka di w te li. Egzamine kontèks la. Egzamine tout ti detay yo epi sèvi ak kat yo e ak referans ki nan mitan chak paj yo. Fè rechèch sou omwen yon bagay ou pa konprann. Si sa posib, pase plizoumwen menm kantite tan ou fè ap li a pou w ka medite.