Nandarire kutja Ovakriste kave ri kehi yomatwako wa Moses rukwao, omatwako yevari wa ingo,kusuvera Mukuru nokusuvera varwe, ngamba ye raisa oviṋa Jehova mbye undjira ko kweṱe. (Mat 22:37-39) Orusuvero otja indo ka tjiṋa tji tu kwatwa na tjo. Matu sokukondja okukurisa oveni. Omomuano uṋe? Momuano umwe omunanḓengu okulesa Ombeibela eyuva arihe. Indu tji matu tara kovikaṋena vya Mukuru pekepeke mOmatjangwa, eṱe tu ‘himisiwa i ouwa wa Muhona.’ (Eps 27:4) Kunao, tu uta okumusuvera tjinene nokuripura tjimuna ye. Ihi tji tu hinga kutja tu ṱakamise omatwako wa Mukuru, nge kamburira mo okuraisa orusuvero rwatjiri ku varwe. (Joh 13:34, 35; 1Joh 5:3) Imba pe nomapu yetatu, ngu maye tjiti kutja momalesa wetu wOmbeibela ye rire omatjate:

• Ungurisa omeripura woye nawa. Ripura kutja uri mbo. Otjomuna, nokuzuva nokuṋuka iye? Ovandu mbe ri mbo ve ri mongaro iṋe?

• Ungurisa omiano pekepeke. Oviṋa tjiva mbi mo yenene okutjita: Lesa kombanda, poo tji mopuratene kovipuratenwa kongorera mOmbeibela yoye. Pendje nokulesa omakondwa otja mongongorasaneno, lesa ohunga nomundu poo epu kaaṋi mOmbeibela. Otjotjihorera, ungurisa Okambo kokukonḓonona Embo raMukuru Orupa 4 poo oritja 16 okulesa ohunga na Jesus. Lesa ekondwa arihe ku kwa nanwa etjangwa reyuva. Lesa Ombambo wOmbeibela otja mongokorasaneno mu ya tjangwa.

• Zuva nawa imbi mbi molese. Lesa nandarire ekondwa rimwe eyuva arihe nokuripurira ko oukoto, pendje nokulesa omakondwa omengi mena rokutja movanga okumana okulesa Ombeibela aihe. Ripurira koviṋa ongondoroka norupa ndu mo lese. Konḓonona ondjivisiro yoviṋa mbi molese. Ungurisa ovikarata vyehi nozo-marginal references. Tjita omakonḓononeno nepu rimwe ndi u ha zuvire nawa. Tji mo yenene, ungurisa oiri ndji wa kambura okulesa Ombeibela indu tji moripura oukoto.