MATTOLAY NGA CRISTIANO
Nu Kunnasi Mapeggan tu Aya ta Dios anna ta Kasittolay
Maski nu ari ngana meyaplika ta Cristiano ira i Mosaiko nga Dob, isumario lagapa na dua nga pinaka-importante nga bilin naw—ayatan i Dios anna ayatan i kasittolay—i ikikkiddaw nittam ni Jehova. (Mt 22:37-39) Ari nga automatiko yaw nga aya. Mawag nga mappursigi nga mapeggan tu kunnaw. Kunnasi? Tadday i kadaggaw nga pabbibbig tu Biblia. Nu ikonsidera tam i nadduruma nga aspeto na personalidad na Dios ta Katurakan, masingattam i “pagallo” ni Jehova. (Sal 27:4) Nu kunna, dumakal i pangaya tam sa anna maparigattam i appana-panonona. Mapaguyu ittam naw nga tuppalan i bili-bilin na Dios, nelagum i pangipasingan tu minassakrifisio nga aya ta tanakuan. (Jn 13:34, 35; 1Jn 5:3) Yaw i tallu nga suhestion tapenu magenjoy ta pabbibbig tu Biblia:
-
Usan i imahinasiommu, anna i panageno mu. Nonopammu nga egga ka tari. Anni i masingammu, maginnam, anna magug mu? Anni tamma i mataga-tageno danuri egga tari?
-
Padduruman i istilom ta pabbibbig. Yaw i karuan nga opsion: Bibbigan tu masikan, onu tuttulan durante nga ginnan i audio recording. Mabbibbig tu espesipiko nga karakter ta Biblia onu topiko imbes nga bibbigan tu matturunug i kapitulo ira. Angngariganna, usan i Appendix A7 onu B12 ta New World Translation of the Holy Scriptures nu bibbigan i meyannung kani Jesus. Bibbigan i interu kapitulo nu sitaw nala i inaggaw nga teksto. Bibbigan i libru ira na Biblia segun ta patturunug na niketurana.
-
Intindian i bibbibbigammu. Mas mapia i pabbibbig tu maski tadday laman nga kapitulo kadaggaw basta nantindian anna napannonopan tu mapia anne ta pabbibbig tu aru nga kapitulo tapenu laman mabibbig i Biblia. Ikonsidera i lugar nga nikesimmuanna. Alippawatan i detalye ira. Usan i mapa anna marginal reference ira. I-research i ariammu malippawa. Nu posible, parehu nakuan i kapaddu na oras mu ta pabbibbig anna ta monag nga pannono.