Nanaa nōó wɛ o piii lɛ Ācɛ o Yɛce Ukraist kéē yɛce íne ku Umosisi ŋ ma, íne ku Umosisi ɛpa nōo fiyɛ duu a​—nōo wɛ o yihɔtu ku Ɔwɔico mla o yihɔtu ku aoladoobge ku alɔ ​—mafu lɛ alɔ ɔdā nɛ Ujehofa dɔka ŋma ɛgiyi alɔ a. (Umt 22:​37-39) Ɔcɛ duuma i lugwu ku ɛdɔ ihɔtu nyā gla ŋ. O cɛgbá ku alɔ nwu ɛdɔ ihɔtu nyā piii. Ɛgɛnyá nɛ alɔ gáā ya ɛnyā a? Ɔwɛ o cɛgbá éyi wɛ ō jé Ubáyíbu ɛ̄cī doodu. Eko duuma nɛ alɔ gē klɔcɛ ku auce o ya ɛyɛɛyɛyi ku Ɔwɔico nōó mafu lɛ alɔ ipu Ubáyíbu a, alɔ géē yɔ i má “ɛ́gɛ́nɛ̄ ó gē yá ɔdā olɔhi lɛ ā.” (Aíjē 27:4) Ɛnyā, géē cɛ lɛ ihɔtu nɛ alɔ lɛ lɛ ɔ a kóō jɛ gɔbu, ɛlá o gbo ku alɔ klla géē wɛ ɔwɛ enkponu mla aku nu. Ihɔtu nɛ alɔ lɛ lɛ Ɔwɔico a géē ta alɔ abɔ ku alɔ lɛ íne ku nu tu, bɛɛka íne nōo ka alɔ mafu ɛnɛnɛ ihɔtu lɛ ayinɛ alɔ a. (Ujɔ́ 13:​34, 35; 1Ujɔ́ 5:3) Má ɔdā ɛta nōo géē ta uwɔ abɔ ku Ubáyíbu ō jé kóō lɔɔnyɛ tu uwɔ bɛɛka usuga a:

• Gbɛla tu ɔdā nɛ a jé a lɔɔlɔhi. Má iyi uwɔ bɛɛka a yɔ abɔ a. Ɔdi nɛ a lɔfu má mla eyī ku uwɔ, po mla ahɔ̄ ku uwɔ amāŋ ɛ̄nɛ̄ o lɔfu wa ɔtu ku uwɔ gla a? Ɔdi lɔfu yɔ ipu ɔtu ku ɔcɛ amāŋ ācɛ nɛ a yɔ i klɔcɛ lɛyikwu a?

• Bi ɔwɛ ɛyɛɛyɛyi. Ɔwɛ ōhī yɔ a: Jé tɛɛcɛ gbomgbom, amāŋ a lɔfu yɛce aɔkɛlā ku Ubáyíbu ō jé néē gwotu a. Klɔcɛ lɛyikwu ɔcɛ éyi amāŋ ikpɛyi ɛlā éyi ikɔkɔ nɛ a géē yɔ i jé ŋma ikpɛyi ɛlā éyi gā ikpɛyi ɛlā ɔhá a. Ocabɔ mafu, bi Appendix A7 amāŋ B12 nōo yɔ ipu New World Translation of the Holy Scriptures ku a le klɔcɛ lɛyikwu Ujisɔsi. Lɛyi ku Ubáyíbu néē je ikpɛyi ɛlā ku daily text ŋma anu a jé. Jé aɔkpá ku Ubáyíbu a ɔgbɔɔgba ɛgɛ néē tá ɔ lɛ a.

• Jé Ubáyíbu o ya ɛɛ ku a jɛyi nu. O géē lɔhi fiyɛ ku a jé ɛyi ku Ubáyíbu éyi foofunu ɛ̄cī klla gbɛla ta ɔ, kóō ta uwɔ eyī peee, ikɔkɔ o jé ɛyi ku Ubáyíbu alɛwa nɛ a gáā jé ɛyi ku ɛlā nɛ a yɔ i jé ŋ ma. Leyi yɔ eko, ɛga, mɛmla ɔdā nōo yɔ i ya eko ɔɔma a. Leyi yɔ aɛlā a lɔɔlɔhi. Bi aumaapu mla ɛga ku Ubáyíbu ɔhá néē ta ɔtahɛ upeji ku Ubáyíbu a yuklɔ. Lɛ ɛlā nóō ta uwɔ eyī peee ŋ ma jila má. Ɔdaŋ ka o tɔɔtɛ, eko nɛ a géē le jé Ubáyíbu kóō nwune bɛɛka eko nɛ a géē bi le gbɛla tɔ a.