Nanana nyori Angịnyị nya ịKịrayịsị-ị́ ka ba Ehile nya iMosisi jẹ alẹ kaka, ọ-họ ẹla ọlẹ ká iJihova tọ tị kpụnịrọ Ehile imiiye ịlẹ wẹẹ​—ọháha ọlala ẹ-ẹga nya Ohe Oluhye bala ọháha ẹ-ẹga nya ọngịnyị ọọnahị. (Mat 22:​37-39) Ọngịnyị-ị́ ka jẹ́-ẹ ri ugu nya ọháha ọlịịwẹ ka. O ri opyii kahị ka lọọ lịlọhị. Ányị ahị tị́ ka bwu họ ịnyị? Ụgbẹyị ọnyịila ọhẹ ri ịBayịbụụ ọwawa la ahyẹẹnụ ọnyị myị́ ọnyị. Ụka kahị kụ ẹhị yẹ abwụma ịdatị-datị ịlẹ ká iJihova la jaabwọ ká Ụpwụ Ịgọgọ chabwọ nyaa, ọọwa ka dudu kahị ka jẹ́-ẹ “gbẹhị da ụ́hị nyamwụ teee” (Eje 27:4) Bwula ọwẹ, ọháha nyahị ẹ-ẹga nyamwụ ka ya kẹng-kẹng, irya omeme nyahị tị ka pwoku ịnyamwụ ayịdang ịnyịnyị. Ọ ka guhi gbịla nyọka kpa ehile nya Ohe Oluhye jịra, tụ ehile nyọka la ọháha o-gbu enyi ka ẹ-ẹga nya angịkịla. (Jọn 13:​34, 35; 1Jọn 5:3) Agbẹyị ịta ịlẹ ka dahị ụbwọ nyọka họ ká ịBayịbụụ ọwawa nyahị ka kpịpyọ:

• Me irya jwoo kpori-kpori, ká yẹ ịlọng ẹ-ẹpwụ nyamwụ. Kụ irya nyori à juwa ẹ-ẹga ọọwa wẹẹ. Ẹlịyẹ a tị́ ka wo, ịyẹ a tị́ ka yẹ bala oru oyina a tị́ ka wo? Ányị ọ tị́ ka la angịlẹ kị́ juwa ẹ-ẹpwụ nya iwe-ahụrụ ọwẹ?

• Kpa abwụma ịdatị-datị. Lala agbẹyị ịlẹ: Wa ụpwụ lịlọng gboo, lee ọ-kpẹhị dịrẹ ịBayịbụụ nyang ụka ká juwa ke ụrụ wo omyi ẹla ọlẹ kị́ kịla ju. Ọkọkọ nyọka bwu egbeju nya ụpwụ ọhẹ ka ọkịla, chụ oja nya ọngọhẹ bwu ẹpwụ nya ịBayịbụụ, ka wa oja ọọwa hịlẹ-hịlẹ. Lala ọ-chụ pwokwịta, kpa Appendix A7 lee B12 ọla New World Translation of the Holy Scriptures jẹ́ ang u-uhye nya iJisọsị. Wa egbeju nya ụpwụ ọlẹ kị́ gba ang ọjẹ́jẹ nya ahyẹẹnụ nyahị kpehe bwu wuu. A ka jẹ́-ẹ wa apwụ nya ịBayịbụụ bwula ọ-dịrẹ ụgbẹyị ọlẹ kị́ bwu daa ba awụlẹ ba ịnyịnyị myị́.

• Wa ụpwụ ụ-ụgbẹyị ọlẹ á ka wo ẹla ọlụwa rige-rige. Ọ-ka kpẹhị chịng wa egbeju nya ụpwụ ookpokpo bala ọ-kụ irya jwọọ kpori-kpori ẹ-ẹpwụ nya ahyẹẹnụ há gụ ọ-ka wa egbeju nya apwụ lụmẹ-lụmẹ la agaga chajị nyọka waa wuu. Kụ ẹhị yẹ ụka, ẹga bala iwe-ahụrụ ọlụwa. Myịmyị kụ irya ju ụbẹtụ-ụbẹtụ nya oja ọọwa. Kpa ịmapụ bala ọ̀ya ị-da ụbwọ ka ẹga ọkịla ịlẹpwarịrị nya ịBayịbụụ họ ụkụrwọ. Maga ká jẹ ang gụ ọwọwa u-uhye nya ẹla ọle kọ lang gbagbịla ka. Kori ọ́ chịkpẹẹ, ụka ọlẹ á ka kpa wa ụpwụ bala ọlẹ á ka kpa kụ irya jwọọ á la ookpokpo.