Hkristan ni hku nna, Mawshe a tara hpe n hkan sa ra sai raitim, Karai Kasang hte htingbu wa hpe tsawra u ngu ai, kaba htum hkang da ai tara lahkawng gaw, anhte kaw na Yehowa hpyi shawn da ai ni yawng hpe madun ai. (Mat 22:37-39) Tsawra myit gaw, shi hkrai shi nga wa ai n re. Dai atsam hpe shalat la ra ai. Gara hku shalat na kun? Ahkyak ai lam langai gaw, shani shagu Chyum Laika hti ra ai. Chyum daw ni hta na, Yehowa a atsam ningja ni hpe anhte hti ai shaloi, “Yehowa a mai kaja ai lam” hpe mu wa na re. (Shk 27:4, NW) Akyu gaw, shi hpe tsawra ai myit grau kaba wa nna, shi ra ai hku myit mang chye wa na re. Dai gaw, Karai Kasang a tara ni hpe hkan sa na matu shadut ya nna, kaga masha ni hpe mung, tinang akyu n tam ai sha, tsawra chye wa na re. (Yhn 13:34, 35; 1Yh 5:3) Chyum Laika hti ai hpe grau ra sharawng wa na matu, lawu hta lam matsun masum hpe madun da ai.

• Shingran yu u, myit maju jung u. Dai shara hta du nga ai ngu shingran yu u. Nang hpa ni hpe na ai, mu ai, hpa sama ni lu ai kun? Gara hku hkam sha ai kun?

• Lam amyu myu hku galaw u. Galaw lu ai lam nkau mi gaw: Nsen shapru nna hti u. Nsen rim da ai audio hpe madat let hkan hti u. Chyum Laika a daw kaba langai hpang langai, azin ayang hti mat na malai, Chyum Laika hta na masha, shing nrai mabyin ni hpe hkan hti u. Ga shadawn, Yesu a lam hpe hti na matu, Mungkan Nnan Ga Gale Chyum Laika (BU) a Bungjat daw A7 hte B12 (နောက်ဆက်တွဲ က၇ နဲ့ ခ၁၂) hpe yu u. Shani shagu na Chyum daw hta lakap da ai daw kaba hpe hti u. Chyum Laika buk ni hpe ka da ai shaning hku hkan nna hti u.

• Chye na hkra hti u. Chyum daw langai hpe shani shagu, chye na hkra hti nna myit sawn sumru ai gaw, Chyum Laika daw kaba law law hpe ngut hkra hti ai hta grau kaja ai. Shingdu masa ni hpe myit yu u. Ahkri ahkrai hkaja u. Shingdaw da ai Chyum daw ni hte lamu ga sumla ni hpe yu u. Nang n chye na shi ai lam hpe tam sawk sagawn yu u. Byin mai yang, nang hti wa ai aten daram, myit sawn sumru u.