Nonande Ovakriste kunena kave li koshi yOmhango yaMoses, Kalunga okwa teelela va kale hava dulika koipango oyo ivali inene; okuhola Kalunga nosho yo ovanhu vakwao. (Mat 22:37-39) Ohole ya tya ngaho kai fi oufyuululwakwatya. Oi na okukulikwa. Ngahelipi mbela? Onghedi imwe ya fimana omokulesha Ombiibeli efiku keshe. Eshi to ka konakona omaukwatya aKalunga a yoolokafana mOmishangwa, oto ka mona “ouwanyenye wOmwene.” (Eps 27:4) Oshidjemo, ohole yetu yoku mu hola otai ka kula nohatu ka kala tu na omadiladilo a fa aye. Osho otashi tu linyengifa tu kale hatu dulika koipango yaKalunga, mwa kwatelwa oshipango shokuhola ovanhu vakwetu. (Joh 13:34, 35; 1Joh 5:3) Apa otapa shikula omaetepo anghee to dulu okuhafela elesho loye lOmbiibeli:

• Longifa oyuuditifi yoye nokufaneka momadiladilo oiningwanima. Kala nee ngeno u liwete u li poshiningwanima osho. Kala nee ngeno wa fa u wete omudingonoko, u udite edimba nomalinyengo. Ovo ve li moshiningwanima osho ove udite ngahelipi?

• Lesha meenghedi da yoolokafana. Osho to dulu okuninga: Lesha mokule ile u shikule eshi to pwilikine kelesho lOmbiibeli olo la kwatwa momawi. Lesha kombinga yomunhu wonhumba mOmbiibeli ile ehokololo lonhumba ponhele yokulesha omatukulwa melandulafano. Pashihopaenenwa, longifa oshitukulwa 4 ile 16 shokambo Okalongifwambo kokukonakona Eendjovo daKalunga u leshe kombinga yaJesus. Lesha etukulwa alishe lembo omo mwa dja omushangwa wefiku. Lesha omambo melandulafano ngaashi a shangwa mOmbiibeli

• Lesha nelalakano lokuuda ko. Oshi li xwepo u leshe etukulwa nande limwe, to lesha nelalakano lokuuda ko nokudilonga ponhele ashike yokulesha nelalakano lokumana ko Ombiibeli. Konakona kutya ehokololo otali popi kombinga yashike. Nongonona ouyelele aushe oo wa kwatelwa mo. Longifa ouwaalita nosho yo oudidilikondada ovo tava kwatakanifa omishangwa. Ninga omapekapeko oshitwa osho uhe udite ko. Ngeenge otashi shiiva, dilonga oule wefimbo la faafana naalo wa longifa eshi wa li to lesha.