Христианнарға Моисейнің чахығларын тудынарға кирек полбаза даа, аның ікі илбек чахии — Худайға хынарға паза чағыннарға хынарға — Иегова пістең ниме сағыпчатханын піліп аларға полысча (Мф 22:37—39). Андағ хыныс позы ла пол парбинча. Аны ӧскірерге кирек. Хайди? Библияны кӱннің сай хығырғаны — уғаа аарлығ ондайларның пірсі. Библияны хығырып, Худайның аймах-пасха сариларын піліп одырчатсабыс, «Иегованың паарсазын кӧріп» пастапчабыс (Пс 27:4). Худайға хынчатханыбыс ӧсче паза пістің сағынчатхан оңдайыбыс аның сағынчатхан оңдайына уламох тӧӧй полча. Анзы Худайның чахығларын, оларның санында, позына айанмин, пасхаларына хынарға тіп чахығны толдырарға кӧӧктірче (Ин 13:34, 35; 1Ин 5:3). Библияны хығырарын хынығ арах идібізерге мына нинҷе-де чӧп:

• Хығырчатсаң, сынап кӧрген чіли, сағын тур паза анзы чӱрееңе теелзін. Киректер полчатхан орындазым тіп сағын кӧр. Ниме кӧр саларҷыхсың, ниме ис саларҷыхсың паза ниме чувствовать поларҷыхсың? Ол киректе араласхан кізілер ниме чувствовать полған поларлар?

• Аймах-пасха оңдайларнаң хығыр кӧр. Мына оларның піреезі. Истілдіре хығыр паза аудозапись исчетсең, хығырчатханын сыныхта. Пірее кізідеңер алай сағаа хынығ темадаңар пазылчатхан кизектерні таллап хығыр кӧр. Кӧзідімге, Иисустаңар хығырчатсар, «Слово Бога в картах и схемах» тіп брошюранаң тузалан (4 паза 16 приложениелер). Пастағны, хайзынаң полған на кӱн хығырҷаң стих алылған, прай хығырыбыс. Библиядағы кинделерні пазылған чылларының хоостыра хығыр.

• Тирең сағынып хығыр. Кӱнде кӧп ле хығыр салар ӱчӱн, кӧп пастағлар хығырғанҷа, пір пастағны хығырыбызып, аны чахсы піліп алғаны паза аннаңар тирең сағынғаны артых полар. Контекстті паза ол туста ибіре ниме полғанын санға ал. Оох-теек нимелерге хайығ сал. Карталарнаң тузалан, сноскалар паза перекрестнай ссылкалар кӧр. Пілдістіг нимес сурығларның пір суриин даа істес кӧр. Хығырарға нинҷе тус хоратчазың, ибіре тирең сағынарына анҷаох тус хорадарға кӱстен.