Sumbala lelu o Jikidistá ka mu kayela dingi o Kitumu kya Mozé, maji o ijila iyadi yiyi ya beta-o-kota, o kuzola Nzambi ni kuzola akwetu, ilondekesa hanji o ima i kingila Jihova kokwetu. (Mat 22:37-39) O henda yiyi ki tu tena ku i lundula, mba ka tena ku tu bhana-yu. Twa tokala kubhanga yoso phala kukala na-yu. Kyebhi? Mu kutanga o Bibidya Izuwa yoso. Kyoso ki tu xinganeka mu idifwa ya Nzambi, kala kyo soneke mu Mikanda Ikola, twa-nda tena kumona ‘o kuwabha kwa Jihova.’ (Jis 27:4) Mu kiki, o henda yetu kwa mwene ya-nda dibandekesa dingi, o ixinganeku yetu we ya-nda difwa ni ya Nzambi. Kiki kya-nda tu kwatekesa kukumbidila o itumu ya Nzambi, ni kulondekesa henda ni muxima woso ku akwetu. (Nz 13:34, 35; 1Nz 5:3) Tala jindunge jitatu phala kuwabhela dingi o kitangelu kyé kya Bibidya:

• Xinganeka. Xinganeka kwila wala koko. Ihi i weji mona, kwívwa, ni kunuha? Nange ihi ya mu divwa o athu mu musoso?

• Lungulula o ukexilu wa kutanga. Kayela o jindunge jiji: Tanga ni dízwi dya swina, mba kayela o kitangelu mu Bibidya yé, se wa mu kwívwa o Bibidya yongalavale. Tanga ya lungu ni musoso wa muthu umoxi a mu tange mu Bibidya, mba maka amoxi, mu veji dya kutanga ibatulu mu ibatulu. Mu kifika, tala o Apêndice A7 mba B12 mu Tradução do Novo Mundo da Bíblia Sagrada, phala kutanga ya lungu ni Jezú. Tanga o ibatulu yoso mwa tundu o ibatulu ya izuwa. Tanga o madivulu a Bibidya mu ukexilu ma a soneka (na ordem em que foram escritos).

• Tanga phala kutendela o ima i wa mu tanga. Kya beta-o-kota o kutanga kibatulu kimoxi mu kizuwa mu kuxinganeka ni kutendela o ima i wa mu tanga, mu veji dya kutanga ibatulu yavulu sé kutendela, kifwa phala kuzubha ngó o kitangelu kyé. Xinganeka mu ima ya mu bhita. Mu ima yoso ya lungu ni musoso. Tala o jimapa ni kijila kya kubandekesa milongi ku lwiji lwa madivulu (referências marginais). Tokwesa pondo imoxi ki wa mu i tendela kyambote. Se ki bhana, o jihola ji wangastala mu kutanga, jene we ji ungastala mu kuxinganeka.