Mi che bɛɛ Kilisiɔŋnda cho o Sawa Mɛlɛka ndoo ke Muuse wo bɛŋgu le, kɛ sawala tiɔɔŋnda hiou sawalaŋ kpou laŋ—kaalaa le Mɛlɛka a kaalaa le chaaŋ num wana chioo—la cho wɔ chɔmndo nyɛ Chɛhowa yeema naa miŋ tosa wo. (Mat 22:​37-39) A vilu naa a kaala suu waa naa le. Ŋ nɔ miŋ kindiŋ le ndu sɔlaa. Vɛɛ naŋ sɔla yɛ ndu? Nɛi sɔviɔɔ opilɛ naŋ sɔla ndu wo cho diomndaŋ veeloo lɔɔlɔɔ o Baabuiyo niŋ ni. Te ŋ yaasiaa pɛ suliŋnda yɛ yɛla Mɛlɛkalaŋ o Baabuiyo niŋ, ŋ nɔla miŋ wa “naŋɔɔ ndɔ kɔndɔfillo chɔɔ.” (Sam 27:​4) Fulamakɔɔlioo cho ni, kaala naa le Mɛlɛka cho hiouwɔɔ lachi nduyɛ mi yiyaŋnda naalaŋ la wa maa ndu. Hei nyindu naa miŋ bii sawala Mɛlɛkalaŋ, mɛɛ sawaa le sala soliaŋndo le acheleŋnda kaalaa chɔmndo cho naa yɛ. (Chɔŋ 13:​34, 35; 1Chɔŋ 5:​3) Tofa kɛɛsiaalaŋ la yaa mɛɛ ŋ tuɛi diomndaŋ veeloo yeela o Baabuiyo niŋ yɛ:

• Soliŋ yiyaŋ numndo kpeku, nduyɛ ma lueŋ numpila o suɛi waa lende niŋ. Yiyaŋndɔ maa num cho loŋ ni. Yɛɛ ŋ cho yɛ chɔ, yɛɛ ŋ cho yɛ tueiyɔɔ, nduyɛ yɛɛ ŋ cho yɛ tueiyɔɔ chuŋ? Vɛɛ wanaa cho o suɛi keŋ niŋnda cho yɛ yiyaŋ?

• Soliŋ nɛila yɛ yɛlaŋ kpeku. Tofa kɛɛsiaalaŋ lapum: Veelu diomndaŋ choo choo, ɔɔ ma yaŋ nilaŋ o wanaa nda chua niŋ diomndaŋ nda. Veelu diondaŋ a wana kpeekpei Baabuiyo soo okɔɔ wo ɔɔ suɛi lebolle kɛ, o cho le buŋgɛi chiiyo le. Le taamaseliiyo, a soliŋ buŋgɛi 4 ɔɔ   ɔɔ 16 o Yau Mala Naa le Diom Mɛlɛkaa Pɛɛkoo Wo niŋ ma veelu diomndaŋ a Chiisu okɔɔ. Veelu diomndaŋ kpou o bolle Baabuile tɛɛsiiyo fula niŋndeŋ. Veelu diomndaŋ o yaula cho o Baabuiyo niŋndaŋ le ma sina a teleŋ nda poonyiaalaŋ ndo.

• Veelu diomndaŋ le ma bii bila. Diomndaŋ veeloo o bolle Baabuileŋ lepilɛ o paaleŋ niŋ ma bii bila nduyɛ ma yiyaŋ lechoo, o bɛnda mbo hiau diomndaŋ veeloo o bolii Baabuiye niŋ tau le buŋgɛi chiiyo. Yiyaŋ a fondaŋ nda poonyiaa leŋ ndo. Ma yiyaŋ lechoo yiŋguloŋ. Soliŋ mapiilaŋ kpeku a “Bible Glossary” o New World Translation nda kpɛlɛkiaa wo niŋ. Tosa yaasiaa le suɛi kulii ŋ bii bila le ve. Te o bɛnda pɛ, soliŋ vɛlɛ teleŋ pilɛ koŋ kpe kpeku le yiyaŋndo lechoo mɛɛ ŋ chua teleŋndo le diomndaŋ veeloo yɛ.