Nabi kwaamba ayi Beneklistu tabeelete kukonkela mulawo wakwe Mose, milawo yobilo inene—mulawo wakusuna Lesa akusuna babyesu—ulatondesha Yehova nshaasuni kulindiswe apacecino ciindi. (Mate. 22:37-39) Taakuwo muntu wakashalwa alusuno ulu. Aboobo tulyeelete kulwiiya. Munshila nshi? Nshila yomwi iyandika abuumbi nkwiinda mukubelenga Baibo bushiku abushiku. Kwiiya mbasu shipusene pusene sha mibo ibotu yakwe Yehova kweelana amboitondeshekwa mumalembo, kulaakutucafwa kubona “bubotu bwakwe Yehova.” (Kulu. 27:4) Kushiba bubotu bwakwe Yehova kulakomenya lusuno lwesu pali nguwe alimwi tulatalika kubona shintu bweenka mbuli mbwashibona. Ici cilatuyuminisha kunyumfwila milawo yakwe Lesa, kwiilikaawo amulawo wakutondesha lusuno lwakulyaaba kubamwi. (Joni 13:34, 35; 1 Joni 5:3) Nsheshi nshila shotatwe sheenga shamucafwa kusangalala ndyemutobelenga Baibo:

• Amuyeeye nshemutobelenga, akubikako maano oonse. Amuyeeye ayi amwebo nkomuli. Nshiinshi nsheenga mwaboona, kukutika, akunyumfwa? Ino abo batokwaambwawo mutoyeeya ayi bakalinga kulinyumfwa buyani?

• Amusebenseshe nshila shipusene pusene. Shimwi nsheeshi: Amubelenge cakupoosha, na kukonkelaamo ndyemutokutika kubelenga kwakalekodwa. Amubelenge pa muntu umwi waambwa mu Baibo na makani amwi muciindi cakubelengabo macapita kweelana ambwakalembwa. Kucakubonenaako, inga mwabelenga pali Yesu kwiinda mukusebensesha lubasu lwa Makani Aayungizyidwe A7 na B12 mu Baibo ya New World Translation of the Holy Scriptures. Amubelenge capita yoonse paswa lilembo lya bushiku. Amubelenge mabuku amu Baibo kweelana ambwakonkana kulembwa.

• Amubelenge akunyumfwishisha. Amubelenge akunyumfwisha alimwi akuyeeyawo nabi capita yomwibo pabushiku muciindi cakubelengabo ayi mumanishe macapita aanji. Amuyeeye mboshakalinga kucitika. Amulange lange makani oonse. Amusebenseshe kabotu ma maapu amalembo amwi ayo acanika mweela. Amulangoole makani amwi ngweenga mwasuna kunyumfwisha kabotu. Na kacikonsheka amutole ciindi kuyeeyawo, bweenka mbuli mbomwacita ndyemwalinga kubelenga.