Nihaike kuli Bakreste habalateleli luli Mulao wa Mushe, litaelo zepeli zetuna ka kufitisisa ze mwa Mulao wo ili kulata Mulimu ni kulata batu, lisabonisa zatokwa Jehova kuli lueze. (Mat. 22:37-39) Lilato lelicwalo haliitahelangi feela. Luswanela kuikataza kuba ni lona. Lukona kueza cwañi cwalo? Nzila yeñwi ya butokwa yelukona kueza cwalo ki ka kubalanga Bibele zazi ni zazi. Halunyakisisa tulemeno twa Mulimu totushutana-shutana ka mo tutaluselizwe mwa Mañolo, lubona “bunde bwa Jehova.” (Samu 27:4) Ka kueza cwalo, lilato laluna ku Mulimu lika hula, mi lukaanga lika mwaliingela Jehova. Nto yeo ilususueza kuli lumamele litaelo za Mulimu, hamohocwalo ni taelo ya kulata babañwi kuzwelela kwa pilu. (Joa. 13:34, 35; 1 Joa. 5:3) Ki ze liakalezo zekona kulutusa kuikola kubala Bibele:

• Mueze inge kuli mwabona ni kuutwisisa likezahalo zemubala. Mueze inge kuli muteñi kwa sibaka seo. Ki lika mañi zemubona, kuutwa, ni kulupelela? Batu bababulezwi mwa taba yemubala baikutwa cwañi?

• Mubale ka kuitusisa miezezo yeshutana-shutana. Ki ze zeñwi zemukona kueza: Mubale ka kutumusa, kamba mwakona kuteeleza ni kulatelela mwa Bibele yamina litaba za mwa Bibele za mulumo zebalilwe kale. Mubale ka za mutu yomuñwi yabulezwi mwa Bibele kamba kubala taba yeñwi kufita kubala ka kulatelela feela likauhanyo molitatamanela. Ka mutala, muitusise Litaba Zeekelizwe A7 kamba B12 ze mwa Bibele ya Toloko ya Lifasi Lelinca kuli mubale litaba ka za Jesu. Mubale kauhanyo kaufela molizwa liñolo la zazi. Mubale libuka za mwa Bibele kulikana ni mone liñolezwi ka kutatamana.

• Mubale ka nzila yekamitusa kuutwisisa. Kubala nihaiba kauhanyo iliñwi zazi ni zazi ni kuiutwisisa mane ni kunahanisisa zemubalile kutusa hahulu kufita kubala likauhanyo zeñata ka kubata feela kufeza kapili. Munyakisise muinelo one bali ku ona batu bemusweli kubala za bona. Munahanisise litaba zemubala ka butungi. Muitusise limapa zebonisizwe hamohocwalo ni mukoloko wa Mañolo alibisa kwa Mañolo amañwi. Mueze patisiso ya taba yeñwi yemusa utwisisi. Haiba kwakonahala, mutande nako yemutandile kwa kubala Bibele kuli munahanisise zemubalile.