Numba tuhu vaka-Kulishitu kavakavangiza jishimbi jize Kalunga ahanyine Moseko, oloze jishimbi jivali jajilemu jamujishimbi kana jize jahanjika hakuzanga Kalunga navakwetu, jalumbununa kanawa vyuma vize Kalunga asaka kuli etu. (Mat 22:37-39) Katwasemuka nazangi kanako. Ngocho twatela kuzata nangolo numba tupwenga nayo. Mujila muka? Jila yimwe yayilemu shina kutanganga Mbimbiliya hakumbi hakumbi. Nge natushinganyekanga havilinga vize Kalunga atwama navyo kweseka nomu vavisolola muVisoneka, kaha natumonanga “kuwaha chaYehova.” (Ji 27:4) Kulinga ngocho, nachitukafwa tumuzange chikuma nakushinganyeka ngana mwaikiye. Echi nachitulingisa tukavangize jishimbi jenyi, kuhakilako nalushimbi lwakusolola zangi yakulisuula. (Yow 13:34, 35; 1Yo 5:3) Talenu vyuma vitatu vize vinahase kutukafwa tulivwise kuwaha kutanga Mbimbiliya hakumbi hakumbi:

• Hunananenunga havyuma namutanga. Nge munakutanga Mbimbiliya, shinganyekenu kwijiva nge nayenu kumuli omu vinakusoloka vyuma kana. Vyuma muka muli nakumona, nakwivwa, nakuhumbika? Uno vatu vali mumujimbu kana vali nakwivwa ngachilihi?

• Tangenunga mujijila jakulisezaseza. Kekesenu jijila jimwe jino: Tangilenu helu chipwe kukavangiza mazu akukopa. Tangenu mujimbu wamutu umwe vavuluka muMbimbiliya, chipwe kala chihande muchishishisa chakutanga tupetulu muze valikavangijila. Chakutalilaho, tangenu mujimbu waYesu muVihande Vyakuhakilako A7 chipwe B12 muMbimbiliya yaVisoneka vyaKaye Kakahya. Tangenu kapetulu wosena wamuundu haze hanafumu chisoneka chalikumbi. Kaha nawa munahase kutanga mikanda yamuMbimbiliya kweseka namyaka vayisonekele.

• Tangenunga nakwivwishisa. Kutanga kapetulu umwe nakwivwishisa vyuma munatange nakushinganyekaho, chinawahe kuhambakana kutanga tupetulu vavavulu nakuhona kunganyala. Tachikizenu vyavivulu hamujimbu munakutanga. Kekesenu nawa mashina namasongo amujimbu kana. Zachisenu jimapu navisoneka vyakwinyikilako. Hehwojolenu chishina chize kamwevwishishileko. Nge chinahase, kaha lwola luze mwazachisanga hakutanga lukiko nawa munahase kuzachisa hakushinganyeka havyuma munatange.