Maske nya il tiʼj tuʼn tjapun Tley Moisés quʼn aqoʼ okslal, noqtzun tuʼnj, aqeju kabʼe mandamyent mas nim kyoklen —tuʼn tok qkʼujlaʼn Dios ex qe txqantl— kukx in ayon Dios tuʼn tbʼant kyuʼn tmajen (Mt 22:37-39). Mlay ten kʼujlabʼil lu noq kukx, sino il tiʼj tuʼn tchʼiy. ¿Tzeʼn? Jun tten aju tuʼn quʼjin tiʼj Tyol Dios tkyaqil qʼij. Aj qximen tiʼjju in jaw quʼjin, in nel qnikʼ kyiʼj tbʼanel tmod Jehová ex in nel qnikʼ tiʼj qa tbʼanel te (Sl 27:4). Aju tbʼanel in tzaj tuʼn, in chʼiy qkʼujlabʼil tiʼj Jehová ex in bʼant qximen ik tzeʼnx te. A jlu in nonin qiʼj tuʼn t-xi qbʼiʼn qe tmandamyent, kyxol jlu aju tuʼn kyok qkʼujlaʼn qe txqantl (Jn 13:34, 35; 1Jn 5:3). Qo xnaqʼtzan tiʼj oxe nabʼil in tzaj qʼoʼn, aʼyeju che onil qiʼj tuʼn qtzalaj mas aj quʼjin tiʼj Tyol Dios.

• Tzʼajbʼenx qnabʼil quʼn ex qeju jweʼ qsentid. Qo ximen tiʼj qa atoʼ atz. Tzʼok tilil quʼn tuʼn tok qkeʼyin aju bʼaj kyoj txʼolbʼabʼil in jaw quʼjin, tuʼn tok qbʼiʼn qe tqʼajqʼajel ex tuʼn tkubʼ qnaʼn tkʼokʼjal moqa ttzuwil. Qo ximen tiʼj tiʼ kubʼ kynaʼn qe xjal in yolin txʼolbʼabʼil tiʼj.

• Qo xnaqʼtzan toj junjuntl tten. Jaku qo uʼjin tukʼil tqʼajqʼajel qwiʼ moqa jaku tzʼok qbʼiʼn qe audio o che kubʼ grabarit akux in qo ok lepeʼ tiʼjju in jaw uʼjit. Juntl tumel aju tuʼn quʼjin tqanil tiʼj jun xjal in yolin Tyol Dios tiʼj ex qa tiʼj jun xnaqʼtzbʼil twitzju tuʼn t-xi tzyet quʼn toj Génesis ex tuʼn tpon bʼaj toj Apocalipsis. Jun techel, jaku tzʼajbʼen kʼloj 4 ex 16 te uʼj Jun onbʼil tuʼn qxnaqʼtzan tiʼj Tyol Dios tuʼn quʼjin tiʼj Jesús. Juntl tten, aju tuʼn tjaw quʼjin capítulo jatumel xjatz taqikʼ Tyol Dios te qʼij moqa tuʼn tjaw quʼjin qe uʼj ateʼkux toj Tyol Dios toj ttxolil ik tzeʼnx tej kykubʼ tzʼibʼin.

• Tzʼelx qnikʼ tiʼjju in jaw quʼjin. Mas tbʼanel qa ma jaw quʼjin noq jun capítulo toj qʼij ex tuʼn tel qnikʼ tiʼjju otoq jaw quʼjin ex tuʼn qximen tiʼj, twitzju tuʼn tjaw quʼjin nim capítulo noq tuʼn qbʼet tiʼj. Qo ximen ex qo xnaqʼtzan tiʼj tqanil tok ttxlaj ex kyiʼj junjuntl tqanil, che ajbʼen mapa quʼn ex qe taqikʼ Tyol Dios in qox kyiʼn toj juntl plaj Xjan Uʼj. Ex qo jyon tqanil tiʼj jun tqanil mintiʼ in nelxix qnikʼ tiʼj. Qa jaku bʼant, qqʼonk ax tajlal ambʼil tiʼj tuʼn qximen ik tzeʼnx ambʼil in xi tiʼn tuʼn tjaw quʼjin.