Ningalani tsín tinitjosonñá je kjoatéxomale Moisés ñá xi chjotale Cristo maa, tojo nʼio chjíle je kjoatéxoma xi tso nga tsjoacha koaan je Niná kʼoa kao xíngiaa, kʼoa kui xi mele Niná nga sʼiaan (Mt 22:37-39). Alikui tojbi sʼe̱ná kjoatsjoacha jebi, tjínnele nga kʼoéngikjoamaa. Jméni xi machjén nga sʼiaan. Machjénní nga kʼoéxkiaa je Biblia ngantsjai. Kʼianga nikjaʼaitsjenjiaan jmeni xi tibʼexkiaa, ngisaa nda ʼyaa jokjoan je Jeobá kʼoa kʼoati ʼyaa nga nʼio nda chjota (Sl 27:4). Kʼianga kʼoanʼia sa tsjoacha sa tsjoachaa maa kʼoa chan kʼoatisʼin nikjaʼaitsjeen josʼin síkjaʼaitsjen je. Kui jebi xi basenkaoná nga nitjosoán je kjoatéxomale, jolani nga tsjoacha katamaa je xíngiaa (Jn 13:34, 35; 1Jn 5:3). Janla koya kataʼyaa xi koasenkaoná nga ngisa tsjoa sʼe̱ná nga kʼoéxkiaa je Biblia.

• Cha̱niyaa jkoaa xi tibʼexkiaa. Joxi ñaki ya tiyoaa katamaná, kui si̱kjaʼaitsjeen jméni xi koan, kuinóʼyá jme xi koan jngotjondaini kʼoa katanje̱ná tsojmi xi kisʼe. Si̱kjaʼaitsjeen jókoanle je chjota xi ya tsakatio.

• Nkjín koya josʼin kʼoéxkiaa. Koaan nga nʼio kuinókjoa nga kʼoéxkiaa, kʼoa tsa jngo grabación kuinóʼyalee kʼoa kjuintjengikaoñá je xo̱nná josʼin kjimaxkia. Kʼoati koa̱n kʼoéxkiaa tʼatsʼe jngo chjota xi ya Biblia nroatʼa, kʼoa tsakuije̱ jmeni xi ngisa mandosinná ʼndele nga kjuinkao chʼin chʼiaan nga kʼoéxkiaa je Biblia. Tobʼelañá, koaan si̱chjén je foyeto Xo̱n xi basenkaoná nga chotʼayajiaan Énle Niná ya kjoaʼmiya 4 kao 16 xi nchja̱ni tʼatsʼe Jesús. Kʼoati koa̱n si̱chjén testo xi maxkia nga nyaon nyaon kʼoa kʼoéxkiaa je kapítulole Biblia xi yʼangini, kʼoa tsa maije̱ kʼoasʼin kʼoéxkiaa je librole Biblia josʼin nga kichji nga jngó jngó.

• Kʼoasʼin kʼoéxkiaa josʼin nga koa̱njinná. Tongisaa nda nga tojngo kapítulole Biblia kʼoéxkiaa kʼoa si̱kjaʼaitsjenjinkaoñá ánni nga katamajinniná tikʼoajinni nga nkjín kapítulo kʼoéxkiaa tojoni nga katafitʼaná. Katamajinná jmeni xi tínchja̱ni ngayeje. Chótʼayajiaan jmeni xi koan. Si̱chjén je mapa xi kjio xi kui tsoya kʼoa kao xi referencias marginales ʼmile. Kʼoa kuijnyísjeyaa jmeni xi tsín majinná. Kʼoati kji tse si̱kjaʼaitsjenjiaan jokji tse kabʼexkiaa tsa kʼoakoa̱nná.