Tyam kyaj yëˈë nekypyanëjkxëm ja Ley diˈibë Moisés yajmooy, per ja majtskpë anaˈamën diˈib mas jëjpˈam, ntsojkëmë Dios etsë nmëguˈukˈäjtëm, duˈunyëmë Dios ttsoky ets nbanëjkxëm (Mat. 22:37-39). Yajtunäämbë mëjääw parë tyäˈädë tsojkën yajmëdatët. ¿Ti mbäät nduˈunëm? Tuk pëky yëˈë ko ngäjpxëmë Biiblyë bom bom. Ko nbawinmäˈäyëm diˈib ngäjpxëm, ta nnijäˈäwëm wiˈixë Jyobaa jyaˈayˈaty ets wiˈix jyantsy yˈoyjyaˈayëty (Sal. 27:4). Pën nduˈunëm duˈun, ta niˈigyë ntsokäˈänëm ets duˈun tijaty ndunäˈänëm extëm yëˈë. Tyäˈädë yëˈë diˈib xypyudëkëyäˈänëm parë nmëmëdoˈowëm ja yˈanaˈamën ets ntsojkëm ja nmëguˈukˈäjtëm oy ti xykyamoˈoyëm (Fwank 13:34, 35; 1 Fwank 5:3). Min nˈokˈijxëm tëgëk pëky diˈib xypyudëkëyäˈänëm parë ndukxondakëm ko ngäjpxëmë Biiblyë.

• Nˈokˈyajtuˈunëmë jot winmäˈäny etsë jot jäˈäwën. Nˈokpawinmäˈäyëm ko tam jyawë nyajpatëm. Nˈokˈijxëm tijaty tuun jäjtë, nˈokmëdoowˈijtëm ets nˈokxuukˈäjtëm wiˈix tijaty xyuuky. Nˈokwinmäˈäyëm wiˈix nyayjyäˈäwëdë pënaty yajmaytyaktëp.

• Nˈokˈyajtëgäjtsëm wiˈix ngäjpxëm. Mbäät ngäjpxëm mëk, nbëjtakëm tuˈugë grabasyonk mientrës nbaˈijxëm. Nan mbäät ngäjpxëm mä Biiblyë wiˈix yajnimaytyaˈagyë Dios mëduumbëty o nwinˈijxëm tuˈugë temë en lugäär ngäjpxtsondakëm desde mä tsyondaˈaky axtë mä jyëjpkëxy. Extëm nˈokpëjtakëm, mbäät nyajtuˈunëmë foyetë Naybyudëkë parë nˈëxpëjkëmë Diosë yˈAyuk, mä sección 4 ets 16 mä yajnimaytyaˈaky wiˈixë Jesus jyukyˈajty. Ja tuk pëky yëˈë ko ngäjpxtäˈäyëm ja kapitulo mä ja tekstë të yajjuuty diˈib bom bom yajkäjpxp o ngäjpxëmë Biiblyë desde mä tsyondaˈaky axtë mä jyëjpkëxy.

• Nˈokkäjpxëm parë njaygyujkëm. Tsojkëp njaygyujkëm ets nbawinmäˈäyëm tijaty ngäjpxëm mä Biiblyë, oy jeˈeyë ngäjpxëm tuk kapitulo mä tuˈukpë xëëw en lugäär ngäjpxëm kanäk kapitulo ets kyaj njaygyujkëm. Nˈokwinmäˈäyëm ti diˈib myaytyakypy, nˈokpayoˈoyëm këkpäät, nˈokˈyajtuˈunëmë mapë etsë referencias marginales, ets nˈokpayoˈoyëm diˈib kyaj të njaygyujkëm. Ets pën madakëm, oy ko tuknax ja tiempë nyajtuˈunëm, duˈun mä nˈëxpëjkëm ets duˈun mä nbawinmäˈäyëm.