Meñe Kũrjin ro rejjab pãd ium̦win Kien Moses ak kien ko ruo rel̦l̦aptata rej pedpedin aolep kien ko an Jeova me ekõn̦aan bwe jen pokaki. Ta kien ko ruo rel̦l̦aptata? Ej bwe jen yokwe Anij im ro rũturid. (Mt 22:37-39) Jaar jab l̦otaktok im wõr yokwe in ippãd. Innem ewi wãween bwe en wõr ippãd? Juon wãween ej ilo ad riit Baibõl̦ aolep raan. Ñe jej riit kõn aolep wãween ko rem̦m̦an me Baibõl̦ ej kwal̦o̦k kõn kain Anij rot Jeova, jej “bwilõñ kõn an jouj” im lukkuun em̦m̦an. (Sam 27:4, UBS) Tokjãn men in, jej jino ad yokwe e im l̦õmn̦ak ãinwõt e. Men in ej kõm̦akũt kõj ñan pokake kien ko an Anij, ekoba kien eo ñan kwal̦o̦k yokwe ñan ro jet. (Jon 13:34, 35; 1Jo 5:3) Ñan kõm̦m̦an bwe kwõn lukkuun itoklimo im m̦õn̦õn̦õ ilo am̦ riit Baibõl̦, wãween kein jilu renaaj lukkuun jipañ eok:

• Pijaik ilo l̦õmn̦ak eo am̦ kõn iien eo im am̦ pãd ijo. Ta ko kwõj loi, roñ ainikieer, im ãt bwiier? Ta l̦õmn̦ak im eñjake ko an ro rej pãd ilo bwebwenato eo?

• En ekkãrere kilen am̦ kõm̦m̦ane. Erkein jet iaan men ko kwõmaroñ kõm̦m̦ani: Riit ilo juon ainikien el̦l̦aaj, ak kõjo̦e ainikien aer riiti jebta ko ilo Baibõl̦ im l̦oore aer riit. Ijello̦kun am̦ riit jãn jebta ñan jebta, kajjioñ kããlõt juon armej ak juon men em̦m̦an ippam̦ ilo Baibõl̦ im riiti eoon ko rej kwal̦o̦k kake. Ñan waanjoñak, kwõmaroñ riit kõn bwebwenatoon Jesus ilo am̦ kõjerbal bok jidikdik eo, Kein Jipañ ñan Katak Naanin Anij, M̦õttan 4 im 16. Ak kwõmaroñ riiti aolepen jebta eo kar bõk unin tõl eo an raan eo jãne. Ak bõlen kwõmaroñ riiti bok ko ilo Baibõl̦ ekkar ñan laajrakin iien eo kar jei.

• Riit ñan mel̦el̦e. Kajjioñ riit juon jebta ilo juon raan ñan am̦ mel̦el̦e ta eo kwõj riiti im kõl̦mãnl̦o̦kjen̦ kake. Enaaj em̦m̦anl̦o̦k men in jãn ñe kwaar riiti elõñ jebta ko kõn am̦ kajjioñ ekkaiuriur bwe kwõn kõjem̦l̦o̦k Baibõl̦. Ilo am̦ riit, l̦õmn̦ak kõn jikin eo im ta ko rej wal̦o̦k ilo iien eo. Etale tipdikin men ko kwõj riiti. Kõjerbal mab ko im eoon in jipañ ko jet iturin jebta eo kwõj riiti. Kappok mel̦el̦e ko jet kõn juon men kwaar jab mel̦el̦e kake. El̦aññe kwõmaroñ, kajjioñ kõjerbal ejja joñan aetokin iien eo wõt kwaar riit ñan kõl̦mãnl̦o̦kjen̦.