Cingatenga Awina Klistu wasikonka Isundo lya kwe Musa, amasundo yawili amakulu yano yakalanda pa kukunda Leza na wina mupalamano witu yakatwavwa ukumanya vino e Yehova akalonda twacita. (Mat. 22:37-39) Tusikwatwa nu lukundo lwa musango wo-o, lelo tuzipizile ukuwombesya pa kuwa nalo. Nomba tungacita wuli pa kuti tuwe na lo-o ulongo? Icintu cimwi cino cingatwavwa, akuwazya Baibolo cila wanda. Tulitalika ukulola “uwuzima wa kwe Yehova” pano tukwivwicisya imiwele ya kwe katici katici. (Amalu. 27:4) Cino cilifumamo acakuti tulimukunda nkaninye swinya tulitalika ukwelenganya vino akakwelenganya. Cili watupepucila ukwivwila amasundo yakwe ukusanzyako ni sundo lya kukunda awantu wanji. (Yoha. 13:34, 35; 1 Yoh. 5:3) Lolani ivisinka vitatu vino vingatwavwa sana ukuyitopwa ukuwazya Baibolo:

• Mwakwelenganya ukuti akuno muli pano vino mukuwazya vyacitikanga. Mwakwelenganya ukuti akuno muli. Mwalola vino vikucitika, mwakwivwa icongo, nu kwivwa uwema, swinya mwakwelezya ukuyivwa vino wano mukuwazyapo wayivwanga

• Mwawomvya inzila impusane mpusane pakuwazya. Vimwi vino mungacita: mwapunda, nanti pano mukwivwa kwi lyasi lino wakopa muwakonkamo. Mungawazya pa muntu wumwi uwa mu Baibolo wino mukulonda ukumanya nanti ilyasi limwi ukucila ukuwazya wulyanye vino amabuku yakonkana mwe Baibolo. Ku cakulolelako, mungawomvya vino vyawa pa Appendix A7 nanti pa B12 mwe Baibolo ya New World Translation of the Holy Scriptures pa kuwazya pa wumi nu mulimo wa kwe Yesu. Mungawazya icipandwa consinye pano pafumile iwaliko lya wanda. Nga mukulonda mungawazya amabuku ya mu Baibolo mulyanye muno yakonkanila.

• Mwakwivwicisya vino mukuwazya. Ukuwazya icipandwa conga cilawanda nu kwivwicisya vino tukuwazya kwazipa kwalusya ukuwazya ivipandwa ivivule pa kuti vye tumale ukuwazya Baibolo. Pano mukwelenganya pe vino mukuwazya, mwakwelezya ukulola vino calinji. Swinya mwalola ivisinka vinji vino vizingulusileko. Mwawomvya wa mapu na mawaliko yanji yano wakawika pa kamukololo ka pakasi. Mwasokota nga ca kuti mutivwicisizye. Nga cingacitika mwasumba impindi iyili yonganye pa kwelenganya na yino temwasumba pakuwazya.