Vutuhu Masiko a Mosesa ka esi na ku panga ku Vakua Kilistu, vunoni avali a kama—ku lema Njambi kaha na ku lema vakuetu—a tsindika mu ku muesa vika Yehova ua tonda kuli etu. (Mat. 22:37-39) Cilemo caco ka ve ku semuka naco. Vunoni ce ku tondeka ku lihakela kapandi ka ku ci muesa. Vati tu hasa ku lingamo? Njila imo ya seho ya pua mu ku tanda Mbimbiliya tangua na tangua. Nga tu lilongesa vinjila via vingi vi va lomboluelamo vuntu vua Njambi mu Mbimbiliya, tu ka “mona ku-viuka ca Yehova.” (Visa. 27:4) Mu nima yaco, cilemo cetu kuli ikeye ci ka kola kaha visinganieka vietu vi ka litombola na vieni. Kaha eci cilemo caco ce ku tu sindiya ku ononoka masiko a Njambi, ngeci mua ku ononoka lize lisiko lia ku muesa cilemo ca ku lihana ku vakuetu. (Yoa. 13:34, 35; 1 Yoa. 5:3) Tu talenu evi vinanga vitatu vi hasa ku tu kusa ku ivua ndzolela mu ku tanda Mbimbiliya:

• Pangesenu visinganieka vienu na ku lihaka mu muzimbu uaco. Lisinganiekenu ngue nenu mu mu li mu cimpande caco. Vika mue ku muene? Vika mue ku vuile? Lizimba lika mue ku vuile? Vantu va mu muzimgu uaco vati ve ku livuile?

• Setekenu ku lingamo mu vifua via ku liseza-seza. Aci talenu vino vinjila vi mu hasa ku kava: Tandenu na lizi lia kama, ni kavangeyenu ku tanda ca ku ngalavala laza. Tandenu via umo muntu u va tumbula mu Mbimbiliya ni via muzimbu ua mutuntu mu cihela ca ku tanda tupitulu na kapitulu. Ca ku muenako, citava mu pangese Vimpande via ku vueza ku ntsongo a A7 ni B12 via mu Mbimbiliya Tradução do Novo Mundo da Bíblia Sagrada (mu Putu ni mu malimi eka) linga mu tantekeye via vingi ku tuala hali Yesu. Omo mu tanda mukanda ua litangua, lingenumo mu ku tanda kapitulu kose mu va ka tundisile. Tandenu Mbimbiliya ku liya na vintsimbu vi va sonekelelemo mikanda yose ya kalamo.

• Kalenu na vutumbe vua ku ivuisisa vi mu li na ku tanda. Ku tanda kapitulu kamo na vutumbe vua ku kevuisisa kaha na ku ka hilula vuino ca hiana ku tanda tupitulu tua tuingi na vutumbe vua ku tu tanda vuasi-vuasi. Ngeci mukemuo, omo mu tanda hilulenu viose vi li na ku hitaho. Talenu ku litombola ca muzimbu uose. Pangesenu vi mapa na vinimbu via litombola navio. Setekenu ku ivuisisa vize vintsa ka mua kele na ku ivuisisa laza. Nga citava, ntsimbu i mu pangesa mu ku i tanda i pue imo lika i mue ku pangesele mu ku tanda cenu.