Akin tikchiuaj kemej Cristo amo monekiok tiktakamatiskej Tanauatil tein Dios kimakak Moisés. Sayoj ke ome tanauatilmej tein okachi tayekantokej: se kitasojtas Dios uan oksekin, Jiova kisentoka tajtani maj itekitikauan kitakamatikan (Mt 22:37-39). Nejon netasojtalis amo sayoj ijkon nesi, ta moneki tikiskaltiskej. ¿Keniuj? Se taman tein semi techpaleuis yejua tikixtajtoltiskej Biblia mojmostaj. Keman titanemiliaj itech tein tikixtajtoltiaj, tikitaj ikualneskayouan Jiova tein kualtsitsin uan tikajsikamatij ke tel yolkuali (Sl 27:4). Nejon kichiua maj okachi tiktasojtakan uan maj titanemilikan kemej Jiova. Uan techolinia maj tiktakamatikan itanauatiluan, kemej tikintasojtaskej oksekin ika nochi toyolo (Jn 13:34, 35; 1Jn 5:3). Maj tikitakan eyi taman tein techpaleuis maj okachi techyolpakti tikixtajtoltiskej Biblia:

• Maj tiktekitiltikan totanemilil uan okseki taman tein tikpiaj. Maj tiknemilikan ke ompa timoajsij keman tikixtajtoltijtokej Biblia. ¿Toni tikitaskiaj, tikakiskiaj uan tikijnekuiskiaj? ¿Toni xa kimachiliayaj akin ininka tajtoua Biblia?

• Maj tikpapatakan kemej titaixtajtoltiaj. Uelis chikauak titaixtajtoltiskej oso tikakiskej se grabación uan tiktojtokaskej itech toBiblia. Komo techouijmaka tikixtajtoltiskej Biblia kampa peua hasta kampa tami uelis tikixtajtoltiskej inemilis se akin ika tajtoua Biblia oso se tamachtilis. Kemej neskayot, uelis tikuiskej Amaix tein ika timomachtiaj iTajtol Dios itech taxelolmej 4 uan 16 kampa uelis tikixtajtoltiskej inemilis Jesús. No uelis tikixtajtoltiskej nochi capítulo kampa mokixtij texto tein moita mojmostaj oso amatajkuilolmej itech Biblia ijkon kemej moijkuilojtiyajkej.

• Maj tikajsikamatikan tein tikixtajtoltiaj. Okachi kuali komo mojmostaj tikixtajtoltiaj se capítulo uan itech titanemiliaj uan amo komo tikixtajtoltiaj miak capítulos sayoj porin tiknekij niman timatamiskej. Maj ika titanemilikan versículos tein moajsij achto uan satepan, maj tikitakan nochi tein panok, maj tikuikan mapas uan referencias marginales uan maj tiktemokan toni kijtosneki tein amo tikajsikamatij. Komo ueli, tiempo tein tiuejkauaskej tikixtajtoltiskej Biblia, no ijkon maj tiuejkauakan titanemiliskej itech tein tikixtajtoltiskej.