Akinmej tikchiuaj ken Cristo maski amo moneki tiktlakamatiskej Tlanauatil tlen okijkuilo Moisés, moneki tikintlakamatiskej ome tlanauatilmej tlen okachi inpati: tiktlasojtlaskej toTajtsin Dios uan oksekimej, Jehová kineki ijkon ma tikchiuakan (Mat. 22:37-39). Pero tla tiknekij titetlasojtlaskej, moneki timochijchikauaskej. ¿Ken tikchiuaskej? Achto moneki mojmostla tiktlajtoltiskej Biblia. Ijkuak timokuayejyekoskej tlen tiktlajtoltiaj, tikitaskej ken iyelis Jehová uan ken melauak yolkuali (Sal. 27:4). Uan ijkon okachi tiktlasojtlaskej uan timokuayejyekoskej ken ye. Non techyolinis ma tikintlakamatikan itlanauatiluan uan noijki tikintlasojtlaskej oksekimej maski amo itlaj techmakaskej (Juan 13:34, 35; 1 Juan 5:3). Techpaleuis eyi tlamantli para ma techpakti tiktlajtoltiskej Biblia:

• Ma tiktekitiltikan tokuayejyekol uan ken otechchijchi Jehová. Ma timokuayejyekokan ompa tikatej, ma tikkakikan nochi tlen opanok, ma timokuayejyekokan ken otlamijnekuiaya uan ken omomachiliayaj akinmej ompa okatkaj.

• Tlatlamantli ma timomachtikan. Ma tiktlajtoltikan Biblia uan ma mokaki totlajtol, ma tikkakikan ika audio uan ma tikinmitakan tlaxelolmej. Noijki uelis tiktemoskej tlen okinpanok akinmej ijkuilitokej itech Biblia noso se tlamachtil. Uelis tiktekitiltiskej Amatlajkuilol tlen mitspaleuis timomachtis iTlajtol toTajtsin Dios tlaxelol 4 uan 16 para okachi tikixmatiskej Jesús. Noijki uelis tiktlajtoltiskej tlakotonal kanin omokixti tlaxelol para non tonal noso uelis tiktlajtoltiskej Biblia, tikpeualtiskej Génesis uan titlamiskej Apocalipsis.

• Ma tikajsikamatikan Ijkuak tiktlajtoltiaj Biblia. Okachi kuali mojmostla tiktlajtoltiskej se tlakotonal itech Biblia uan itech ma timokuayejyekokan uan amo san ma tikintlajtoltikan miakej tlakotonalmej para san niman titlamiskej. Ma timokuayejyekokan tlen ijkuilitok achto uan satepan. Ma timokuayejyekokan nochi tlen ompa ijkuilitok. Ma tikintekitiltikan mapas uan referencias tlen katej intlajkotiaj páginas. Ijkuak itlaj amo tikajsikamatij, ma tiktemokan tlen kijtosneki. Tiuejkauaj ijkuak tiktlajtoltiaj se tlakotonal, ijkon ma tiuejkauakan ijkuak timokuayejyekoskej tlen techmachtia.