Pikija maKristu acizivi kusungihwa pa Mutemo wa Mosi, mupango muviri mukuru —Kudisa Mwari no mudoni wedu—jinotatija zvinovetera Jehovha kwatiri. (Mt 22:37-39) Rudo uhu ahugariwi utaka. Unosakurihwa. Kuitisa kudini? Njira imweni inosisira maningi ngo yokuverenga Bhaibheri njiku jese. Patinojija mativi akasiana-siana o undhu hwa Mwari inga zvinovoneswa mu Matahwa, tinobusa “ngo kunaka kwa” Jehovha. (Ndu 27:4) Inga muviyo, rudo hwedu kwaari hunokura zve tova no murangariro inga wake. Izvi zvinotindundira kuti titeveje mupango ja Mwari, kubatanija no rudo hwo kutambujikira vamweni. (Jo 13:34, 35; 1 Jo 5:3) Mazano matatu anotevera anotibesera kuti tiverenge Bhaibheri no mudakaro.

• Shandisanyi kurangarijira kwenyu zve diranyi mazwiro enyu. Rangariranyi mutori kondhoyo. Maizovonenyi, kuzwa no kunuhira? Ngo api kangaije aiva mazwiro o vari kuitikihwaro ndizvona?

• Cinjanyi maitiro enyu. Vonanyi mazano aya: Verenganyi ngo izwi guru kana tevereranyi pamunonga mecizwa zvaka garavhahwi. Verenganyi ngo pamusoro po ndhorovondho yo mundhu kana yo shwiro iri mu Bhaibheri kusiyapo ngo zvipauko. Inga muezaniso, shandisanyi Apendise A7 kana B12 mu Shanduro yeNyika Itsva, yakanasirihwazve, muverenge ngo pamusoro pa Jesu. Verenganyi cipauko cese co vhesi yo njiku jese. Verenganyi mabhuku o Bhaibheri ngo manera o akarongwaro pakutahwa.

• Verenganyi kuti muzwisise. Kuverenga pikija cipauko cimwe basi pa dhia mocizwisisa no kurangarijisisa zviri nane maningi kupinda kuverenga zvipauko zvizinji kuitira kupeja zvakawanda basi. Vonanyi mugariro. Psakanyi zvimuthyathya-muthyahtya. Shandisanyi mapa no referências marginais. Psakisisanyi fundo ramatama kuzwisisa ushoni. Zvecikwanisika, pejanyi nguva yakafanana mecirangarijisisa yamaizoda kupeja meciverenga.