Nonando Ompango yaMoses itayi dhengele kAakriste, iipango iyali iinene kutya natu hole Kalunga nosho wo aantu ooyakwetu, otayi popi shoka Jehova a tegelela kutse. (Mat 22:37-39) Ohole ndjoka ihayi thigululwa, ihe ohayi kokekwa. Ngiini mbela? Omukalo gumwe gwa simana gwoku shi ninga, okulesha Ombiimbeli esiku kehe. Uuna tatu konakona omaukwatya gaJehova gi ili nogi ili ngoka ga popiwa mOmanyolo, ohatu mono ‘uuwanawa we.’ (Eps 27:4) Oshizemo, ohole yetu yoku mu hola ohayi koko nohatu kala tatu dhiladhila ngaashi ye. Shika ohashi tu inyengitha tu vulike kiipango ye, mwa kwatelwa oshipango shokuulukila yalwe ohole. (Joh 13:34, 35; 1Joh 5:3) Opu na omaetopo gatatu ngoka tage tu kwathele tu nyanyukilwe okulesha Ombiimbeli:

• Kala wa fa wu wete shoka to lesha kombinga yasho. Kala ando wa fa opo wu li. Oshike wu wete, wu uvite nowu uvite ezimba lyashike? Mbela mboka taya popiwa mo oyu uvite ngiini?

• Lesha momikalo dha yoolokathana. Nkene to vulu oku shi ninga: Lesha muule nenge landula manga wa pulakena kelesho ndyoka lya kwatwa momawi. Lesha kombinga yomuntu gwontumba nenge yoshipalanyolo shontumba pehala lyokulesha oontopolwa melandulathano. Pashiholelwa, longitha oshitopolwa 4 nenge 16 mokambo Ekwatho kungoye wu ilonge Oohapu dhaKalunga wu leshe kombinga yaJesus. Lesha ontopolwa ayihe moka mwa kuthwa enyolo lyesiku. Lesha omambo gOmbiimbeli melandulathano moka ga li ga nyolwa.

• Lesha nelalakano lyokuuva ko shoka to lesha. Okulesha ontopolwa nando yimwe owala e to yi uvu ko nokutedhatedha kuyo, oshihwepo shi vule okulesha oontopolwa odhindji, opo owala wu mane ko mbiimbeli. Tala kutya iinima oya ningilwa peni. Ndjandjukununa uuyelele mboka. Longitha uualita nomanyolo galwe ngoka ge etwa po. Konga uuyelele wenyolo nando limwe ndyoka kuu uvite ko. Ngele otashi wapa, ethimbo lyokutedhatedha nali kale li thike pwaandyoka wa longitha sho to lesha.