Naamwi Akristu ehicharihaka Nlamulo na Mose, malamulo ala meeli matokotoko—omusivela Muluku ni omusivela mwaacamani ahu—nlelo annaloca mookwasa tiheeni Yehova onaweheryeiye wa hiyaano. (Mat 22:37-39) Okhalano osivela, tahi echu nnaamuyariwaahuno. Nnaphwanela waavya ni wunnuwiha. Mwawiihai? Mukhalelo mmoha woochuneya ori moorweela wa omwaalakhanya Piipiliya mahiku oothene. Vaavaa nnathokororyaahu mikhalelo sincipale sa omuchu wa Muluku, inaphwanyeya mu Soorempwa, hiyaano ninnoona “orèra waya” wa Apwiya Yehova. (Sal 27:4) Ntoko yookhumelela, osivela wahu wa yoowo onnannuwa nave mawuupuwelo ahu annakhala oolikana ni mawuupuwelo awe. Ela ennaneeriha wiiwelela malamulo a Muluku, ophitaanyerya nlamulo na wooniherya waasivela wahu akina. (Yoh 13:34, 35; 1Yoh 5:3) Moone ichu raru sinahaala onikhaviherya okhalano waalakhanya wa Piipiliya woohakalaliha ni wa mphurelo:

• Mpharihele waanyiherya wanyu ni mawuupuwelo anyu. Mwaanyiherye wi nyuwaano muri weiwo. Tiheeni munoonaanyu, muniiwaanyu, ni winkhela waya? Yaale anapaka makupa aniisoona hai?

• Muhiyaniheke nsu variyari va waalakhanya wanyu. Moone meerelo ala: Waalakhanya moovuwa, naari ochariha vaavaa onapakiwaaya waalakhanyiwa wa Piipiliya wooruma. Waalakhanya vooloca sa yaweereya ya muchu naari mwaha ohiya waalakhanya ecima ti ecima. Ntoko yootakiherya, opharihela masu awaaceererya a A7 naari B12 mu Tradução do Novo Mundo wi mwaalakhanye vooloca sa Yesu. Waalakhanya ecima yoothene yoorepa ya nihiku ekuxiwaayavo. Owaalakhanya a liivuru a Mpiipiliyani mucharaka iyaakha sa orepiwa waya.

• Waalakhanya wi mwiiwexexe. Omwaalakhanya Piipiliya naamwi eri ecima emoha pahi wi mwiiwexexe ni wuupuwelelaka vooloca sa yeeyo, echu yaaphama ohiya waalakhanya icima sincipale pahi wi mwaakuve omaliha. Muthokororye yaweereya. Muthokororye tho ichu sawiiseela. Mpharihele maapa, vamoha ni ireferensia. Mpake otholathola wa makupa yaawo muhiiwexenxaanyu phaama. Wawereyavo mmaliheke elukuluku emohamoha ni yeeyo mmalinhaanyu mwaalakhanyaka wi muupuwelele vooloca sa yeeyo mwaalakhannyaanyu.