Yaʼita niha Keriso, lö tafalua saʼae Goroisa Moze. Hizaʼi, lö aetu nasa tafalua goroisa sebua si dombua yaʼia daʼö fangomasiʼö Lowalangi hegöi niha böʼö. (Mat 22:37-39) Tenga iʼotarai me tumbu taʼokhögö waʼomasi simane daʼö, andrö wa moguna tadouʼö ia. Hewisa lalania? Sambua lala yaʼia na tabaso Zura Niʼamoniʼö ero maʼökhö. Na taʼangerönusi gamuata Lowalangi si so ba Zura Niʼamoniʼö, tola tarasoi ’waʼasökhi Yehowa’. (Zin 27:4) Buania, itugu taʼomasiʼö ia ba itugu fakhili-khili wangera-ngerada ba wangera-ngerania. Daʼa zamarou yaʼita ba woloʼö oroisania simane fangomasiʼö niha böʼö. (Yoh 13:34, 35; 1Yoh 5:3) Enaʼö owua-wua dödöda ba wombaso Sura Niʼamoniʼö, so tölu lala si tola tafalua:

• Khalaigö hadia zalua. Angeragö hewisa na so ndraʼugö ba daʼö. Hadia niʼilau, nirongou hegöi niʼagou? Hewisa dödö niha nitutunö ba daʼö?

• Ogunaʼö ngawalö lala. Duma-dumania: Ebuaʼö liu wombaso mazui baso ia si fao fomondrondrongo rekaman audio. Baso waö-waö niha si so ba Zura Niʼamoniʼö mazui duho-tuhonia moroi na öbaso fazania iʼotarai ba wamobörö. Duma-dumania, ogunaʼö faosatö si-4 mazui 16 A ba mbuku Fanuturu Lala ba Wamahaʼö Taromali Lowalangi na öbaso waö-waö Yesu. Baso fefu faza moroi ba ayati nitutunö ba ayat harian ba zi maʼökhö daʼö. Baso fefu nösi Zura Niʼamoniʼö moloʼö waö-waö ginötö ba wanura yaʼia.

• Baso enaʼö aboto ba dödöu. Abölö sökhi na öbaso sambua faza ero maʼökhö, öʼangerönusi daʼö irege so khöu waʼaboto ba dödö moroi na oya öbaso fazania ha enaʼö alio awai. Angeragö zalua hegöi waö-waönia. Ogunaʼö peta hegöi referensi pinggir. Falua riset na so zi lö aboto ba dödöu. Abölö sökhi na fagölö ginötö niʼogunaʼömö ba wombaso hegöi ba woʼangerönusi yaʼia.