Olo kuti Akhilisitu okonkha lini Cilamulo ca Mose, malamulo aŵili akulu-akulu a m’Cilamulo ici—kukonda Mulungu na kukonda anansi ŵasu—ofotokoza mwacidule zinthu zamene Yehova ofuna kuti tikocita. (Mat 22:37-39) Paliye munthu ovyalika na cikondi. Tufunika kucikulisha. Ko tingaikulishe tyani nkhalidwe iyi? Njila imozi yofunika ngako ni kuŵelenga Baibolo siku iliyonse. Patuŵelenga minkhalidwe ya Mulungu yosiyanasiyana yufotokozewa m’Baibolo, tuona “ubwino wa Yehova.” (Sal 27:4) Izi zucitisha kuti cikondi casu pa Yehova cikule ndipo maganizo ŵasu ogwilizana ngako na maganizo ŵake. Izi zutisonkhezela kukonkha malamulo a Mulungu, kuyangizhyilapo lamulo yoonesha cikondi cenecene. (Yoh 13:34, 35; 1Yoh 5:3) Onani njila zitatu zamene zingakuyavyeni kuti mukosangalala poŵelenga Baibolo:

• Mukoona zinthu zamuŵelenga m’maganizo mwanu. Yelekezelani kuti muliko. Ni zinthu zotyani zamuona, zamukumvwa kapena fungo yamukumvwa? Ganizilani mwakumvwila ŵanthu ali m’nkhani yamuŵelenga.

• Seŵenzeshani njila zosiyanasiyana, monga izi: Ŵelengani mokuwa, olo mvwishilani Baibolo yolekodewa ndipo mukokonkha m’Baibolo yanu. Ŵelengani nkhani ya m’Baibolo yonena za munthu muyakine m’malo moŵelenga macapitala kufumila koyambilila mpaka kosilizhyila. Mwacisanzo, mungaseŵenzeshe Cigawo 4 olo 16 m’kabuku ka m’Cinyanja kakuti Buku Lothandiza Pophunzila Mau a Mulungu kuti muŵelenge za umoyo wa Yesu. Ŵelengani capitala conse pamene patolewa lemba ya siku. Ŵelengani mabuku a m’Baibolo pokonkha nthawi peyelembewa.

• Ŵelengani na colinga cakuti mumvwishe. M’malo moŵelenga macapitala anyinji pa siku imozi, ŵelengani capitala cimozi kuti mumvwishishe zamuŵelenga nosinkhasinkha. Ganizilani mwezenzele zinthu. Yesani kumvwisha mbali zonse za nkhani yamuŵelenga. Seŵenzeshani mapu na malemba oyangizhyilika. Yesani kufufuza mfundo zamusamvwisha. Ngati n’zokwanishika, patulani nthawi yokwanila yosinkhasinkha yolingana na yamwaseŵenzesha poŵelenga.