Ovakristau kavalandula Ovitumino viapelwe Moisesi. Mahi Ovitumino vivali vipopia etyi Jeova akevelela kuonthue: Okukala nohole na Huku nokukala nohole novomunthele yetu. (Mat. 22:37-39) Onthue katuatyitilwe notyitwa tyokukala nohole na Huku novo munthele yetu, otyo tuesukisa okulinga ononkhono mbokukala nohole oyo. Ñgeni? Onkhalelo imwe okutanga Ombimbiliya ononthiki ambuho. Tyina tutanga Ombimbiliya “tumona ouwa wa Jeova” iya tupu tukala nomphitilo yokunoñgonoka oñgeni Jeova atuwa. (Sal. 27:4) Ngotyo, ohole yetu na Jeova iliyawisa vali iya onkhalelo yetu yokusoka aikala ngo yae. Otyo tyitulunda okutavela ovitumino via Huku. Otyo tyakutikinya okutavela otyitumino tyokukala nohole novo munthele yetu nokupaka omasuka-suka avo pomphangu yotete tyipona etu. (João 13:34, 35; 1 João 5:3) Tala ovipuka vitatu mavikukuatesako okukala vali nesuko liokutanga Ombimbiliya:

• Undapesa omalusoke opo upoleko ouwa. Tyina utanga linga ngatyina ankho opo ukahi. Okuti utyivila okusoka ponomphangu ankho vekahi iya nokutehelela etompho liavo? Okuti upondola okusokolola oñgeni ankho ovanthu ovo velitehelela?

• Pilaulula onkhalelo yove yokutanga. Upondola okutangela peulu ine hamwe okutehelela Ombimbiliya yatangwa ngondalama. Upondola okuhatange monkhalelo ovikapitulu vielilandula, mahi otange vala onthele ipopia konthele yomunthu umwe ine ehipululo liae. Mongeleka upondola okuundapesa o Apendise A7 ine B12 mo Tradução do Novo Mundo da Bíblia Sagrada opo utange onthele ipopia konthele ya Jesus. Tupu upondola okutanga okapitulu akeho omu muapolwa o testu yonthiki. Upondola okutanga ono testu Mbombiliya omu mbaenganekelwa.

• Ovola okunoñgonoka etyi watanga. Uhatange vala ovikapitulu ovinyingi, mahi hahe vali utange okapitulu keke monthiki, okenoñgonoka iya asokolola kuetyi watanga. Soka ku atyiho iya nokovipuka wavasa-mo. Tanga ono referências cruzadas iya nono mapa. Ovolola onthele imwe wahanoñgonokele wavasa etyi ankho ukahi nokutanga. Inkha tyitavela upondola okukala omuvo omunyi ngou wakala etyi ankho ukahi nokutanga Ombimbiliya opo usokolole kueti watanga.